Yfirlit frétta

Ýmis konar smiðjur og vinnustofur hafa einkennt fyrstu þrjár vikur Barnamenningarhátíðar sem stendur fram að mánaðamótum á Akureyri. Eyjólfur Eyjólfsson heimsótti skóla bæjarins með langspil í farteskinu og lauk sinni ferð með opinni smiðju í Minjasafninu. Þar var einnig haldin orgelsmiðja sem og myndasögusmiðja í Nonnahúsi með Agli Loga Jónassyni. Gilfélagið opnaði myndlistarverkstæði í Deiglunni sem er orðinn árviss viðburður Barnamenningarhátíðar. Á Listasafninu var haldin listasmiðja sem fjallaði um álfa og huldufólk og náttúruna í kringum okkur. Auk þess voru opnaðar tvær nýjar sýningar með verkum barna í Sundlaug Akureyrar og Hofi. Núna á fimmtudag, sumardaginn fyrsta, verður boðið upp á fjölbreytta dagskrá í Listasafninu, Deiglunni, Minjasafninu og Hofi. Hápunkti hátíðarinnar verður svo náð með fjölskyldutónleikum Sumartóna þar sem Emmsjé Gauti stígur á stokk.

Um þessar mundir eru fjögur ár síðan rafrænar undirritanir voru teknar í notkun hjá Akureyrarbæ og hefur þeim fjölgað mikið. Í fyrra voru ríflega 8.100 skjöl, fundargerðir og teikningar undirritaðar rafrænt í gegnum málakerfi bæjarins sem samsvarar í kringum 30 skjölum á hverjum virkum degi ársins.

Margt og mikið bar á góma í líflegum umræðum á árlegum fundi ungmennaráðs með bæjarstjórn sem haldinn var þriðjudaginn 16. apríl sl.