Yfirlit frétta

Í gær var undirritað samkomulag milli meirihluta stofnaðila Iðnaðarsafnsins á Akureyri, sem eru Akureyrarbær, Eining-Iðja og Byggiðn - félag byggingamanna, um að fela Minjasafninu á Akureyri að annast rekstur Iðnaðarsafnsins næstu þrjú árin. Samkvæmt samkomulaginu gerir Akureyrarbær þjónustusamning við Minjasafnið um verkefnið og var sá samningur undirritaður við sama tækifæri.

Gleði og kátína var ríkjandi í Móa þegar ljósmyndari Akureyri.is lagði þangað leið sína í gærmorgun en Mói er deild fyrir elstu börn leikskólans Krógabóls og er í Síðuskóla. Þar stunda nú nám 24 kátir krakkar sem langflestir halda áfram námi sínu í 1. bekk Síðuskóla næsta vetur.

Akureyrarbær leitar að öflugum einstaklingi með metnað, áhuga og hæfni til að leiða velferðarsvið sveitarfélagsins. Velferðarsvið ber ábyrgð á velferðarþjónustu bæjarins, þ.m.t. almennri félagsþjónustu og sértækri þjónustu við börn, fatlað fólk og aldraða.

Í nýrri könnun sem Gallup gerði á þjónustu sveitarfélaga kemur fram að 88% íbúa eru ánægð með að búa á Akureyri. Mest ánægja mælist með sorphirðu, umhverfismál, aðstöðu til íþróttaiðkunar, þjónustu grunnskóla og þjónustu sveitarfélagsins almennt.

Bæjarstjórn Akureyrarbæjar kemur saman til fundar þriðjudaginn 5. mars næstkomandi kl. 16.

Aðalinnritun í leikskóla á Akureyri fyrir haustið 2024 hefst nú í byrjun marsmánaðar. Þá fá foreldrar væntanlegra nemenda send innritunarbréf frá leikskólunum í tölvupósti. Innritað er í hvern skóla eftir kennitölum barna.

Nú eru aðstæður þannig að búast má við svifryksmengun á Akureyri. Í gær var sólarhringsmeðaltal loftgæðamælistöðvar við Strandgötu um 40 µg/m³ en heilsuverndarmörk á sólarhring miðast við 50 µg/m³. Ekki er spáð úrkomu að ráði fyrr en eftir helgi og því má búast við umtalsverðri svifryksmengun í dag og næstu daga. Akureyrarbær og Vegagerðin munu rykbinda götur ef aðstæður leyfa.

Í dag var skrifað undir styrktarsamning milli Akureyrarbæjar og Skíðafélags Akureyrar vegna Andrésar Andarleikana 2024-2028 en í ár verða þeir haldnir 24.-27. apríl og er gert ráð fyrir að þúsundir gesta heimsæki bæinn af því tilefni.