Skipulagsráð

Í upphafi þessa dagskrárliðar vakti Halla Björk Reynisdóttir L-lista á því athygli að hún teldi sig vanhæfa að fjalla um þennan lið. Með vísan til 7. mgr. 20. gr. sveitarstjórnarlaga nr. 138/2011 var meint vanhæfi lagt upp til atkvæða fyrir skipulagsráð og var það samþykkt.

Halla Björk Reynisdóttir L-lista vék af fundi undir þessum lið.


Þórhallur Jónsson tók við fundarstjórn undir þessum lið.


Afgreiðslu frestað þar til fyrir liggja viðbrögð lóðarhafa við innkomnum athugasemdum.


Sindri S. Kristjánsson S-lista óskar bókað:

Fulltrúi Samfylkingarinnar í skipulagsráði hefur þegar lýst yfir efasemdum sínum um fyrirliggjandi tillögur að breytingu á skipulagi svæðisins. Þær efasemdir endurspeglast vel í framkomnum athugasemdum og mótmælum frá stórum hópi íbúa á svæðinu. Út frá þeim einum og sér ætti skipulagsráð að hafna tillögum lóðarhafa nú þegar. En við bætist að á dögunum kynntu lóðarhafar enn eina breytinguna á hugmyndum sínum um nýtingu lóðarinnar, nú með vönduðum þrívíddarmyndum af heilsugæslustöð á lóðinni. Þó að slíkar hugmyndir rúmist e.t.v. tæknilega innan fyrirliggjandi tillögu að skipulagsbreytingum, þá sér hver sem vill að lóðarhafi er afar tvístígandi um hvað hann hyggst fyrir með lóðina. Úr því sem komið er tel ég því rétt að hafna öllum tillögum um breytt skipulag, gefa lóðarhafa svigrúm til að hefja uppbyggingu samkvæmt gildandi skipulagi (sem liggur fyrir nokkuð óumdeilt) eða að öðrum kosti að skila lóðinni aftur til bæjarins svo fljótt sem verða má.


Sunna Hlín Jóhannesdóttir B-lista óskar bókað:

Það hefur verið sterkt ákall frá íbúum Nausta- og Hagahverfis að fá meira líf og þjónustu í hverfin. Ég hef verið mjög jákvæð fyrir því að breyta skipulaginu á þessari lóð til að koma til móts við þær raddir en gert er ráð fyrir einni þjónustubyggingu með stóru bílastæði. Ég sá fyrir mér að fá þarna einhvers konar Kaupang, hús með þjónustu og verslunum, en þá þyrftu líka að vera næg bílastæði. Hér er gert ráð fyrir einu bílastæði á hverja 75 fm í verslunar- og þjónustuhúsnæði. Ég tel það ekki nóg. Svo er spurning hvort bílastæðin verði ekki alltaf full af bílum sem tilheyra eigendum og gestum íbúðanna á efri hæðunum.

Í upphafi þessa dagskrárliðar vakti Halla Björk Reynisdóttir L-lista á því athygli að hún teldi sig vanhæfa að fjalla um þennan lið. Með vísan til 7. mgr. 20. gr. sveitarstjórnarlaga nr. 138/2011 var meint vanhæfi lagt upp til atkvæða fyrir skipulagsráð og var það samþykkt.

Halla Björk Reynisdóttir L-lista vék af fundi undir þessum lið.


Þórhallur Jónsson tók við fundarstjórn undir þessum lið.


Afgreiðslu frestað þar til fyrir liggja viðbrögð lóðarhafa við innkomnum athugasemdum.

Afgreiðslu frestað til næsta fundar og skipulagsfulltrúa falið að leita eftir umsögn Norðurorku og umhverfis- og mannvirkjasviðs. Er skipulagsfulltrúa einnig falið að koma eftirfarandi ábendingum á framfæri:

- Breyta þarf lóðarmörkum á þann veg að um verði að ræða eina samfellda lóð og að gatan Búðatröð verði vegur innan lóðar.

- Lagfæra þarf legu stíga þannig að þeir tengist stígakerfi bæjarins utan lóðar.

- Æskilegt er að ekki þurfi að keyra yfir stíg til að fara inn á P-merkt stæði.


Skipulagsráð vill einnig koma á framfæri efasemdum um staðsetningu þyrlulendingarsvæðis vegna nálægðar við bílastæði, gangstíg og götu. Þá vill ráðið einnig benda á að skynsamlegt væri að gera ráð fyrir bílakjallara strax í upphafi í stað þess að dreifa bílastæðum yfir eins stórt svæði og fyrirliggjandi tillaga gerir ráð fyrir.

Í upphafi þessa dagskrárliðar vakti Jón Hjaltason óflokksbundinn á því athygli að hann teldi sig vanhæfan að fjalla um þennan lið. Með vísan til 7. mgr. 20. gr. sveitarstjórnarlaga nr. 138/2011 var meint vanhæfi lagt upp til atkvæða fyrir skipulagsráð og var það samþykkt.

Jón Hjaltason óflokksbundinn vék af fundi undir þessum lið.


Skipulagsráð hafnar erindinu þar sem tillaga að breyttri útfærslu hefur neikvæð áhrif á öryggi óvarðra vegfarenda á göngustíg sem liggur meðfram lóðinni. Um er að ræða mikilvæga stígatengingu í gegnum hverfið og er ekki talið æskilegt að hún sé þveruð á mörgum stöðum.

Skipulagsráð tekur jákvætt í erindið og samþykkir að tillagan verði grenndarkynnt fyrir lóðarhöfum Ásabyggðar 4 og Byggðavegar 91 þegar fullnægjandi gögn liggja fyrir, þ.e. drög að aðaluppdráttum sem sýna breytt útlit hússins.

Skipulagsráð samþykkir að fela skipulagsfulltrúa að vinna að gerð tillögu að deiliskipulagi fyrir svæðið þar sem tekið verður tillit til fyrirliggjandi ábendinga og athugasemda.

Skipulagsráð tekur jákvætt í erindið og samþykkir að gerður verði nýr byggingarreitur til samræmis við erindið en gerir kröfu um að veggur á lóðarmörkum verði færður aftur um 1 m og gróðri komið fyrir við vesturhlið hans. Að mati ráðsins er breytingin óveruleg skv. 2. mgr. 43. gr. skipulagslaga nr. 123/2010 og skal hún grenndarkynnt fyrir lóðarhöfum Lundargötu 17 og Eiðsvallagötu 4 auk þess sem leita þarf umsagnar Norðurorku og umhverfis- og mannvirkjasviðs.


Sindri S. Kristjánsson S-lista óskar bókað:

Ég tek undir afstöðu meirihluta skipulagsráðs hvað varðar framlagðar breytingartillögur sem snúa að nýjum byggingarreit fyrir bílskúr. Ég er hins vegar alfarið mótfallinn hugmyndum um að reisa megi 180 cm háan vegg í námunda við lóðarmörk. Ásýnd götunnar mun gjörbreytast við slíka framkvæmd en um er að ræða eitt af andlitum bæjarins ef svo má að orði komast. Ekki hafa verið lögð fram gögn sem sýna fram á að slík framkvæmd sé nauðsynleg til að verja íbúa fyrir hávaða og á meðan svo er get ég ekki samþykkt áformin.

Afgreiðslu frestað og skipulagsfulltrúa falið að óska eftir umsögn Norðurorku, umhverfis- og mannvirkjasviðs og Vegagerðarinnar um tillöguna. Skipulagsráð bendir jafnframt á eftirfarandi:

- Gera þarf ráð fyrir hljóðmön og gróðurbelti við austurjaðar svæðisins næst núverandi reiðstíg. Jafnframt þarf að vera hljóðmön og gróður meðfram svæðinu við Hlíðarfjallsveg sunnan svæðisins.

- Tryggja þarf að lýsing á svæðinu sé samkvæmt ljósvistarskipulagi Akureyrarbæjar.

- Gerð verði krafa um afgerandi afmörkun athafnalóða.

Skipulagsráð samþykkir að stæði utan við lóð Hríseyjargötu 14 verði P-merkt.

Varðandi aðgerðir sem fram koma í minnisblaði umhverfis- og mannvirkjasviðs þá samþykkir skipulagsráð að farið verði í aðgerðir merktar 1, 2, 7 og 9. Skipulagsráð telur ekki æskilegt að ráðast í aðgerðir 3, 4 og 5 í minnisblaðinu í ljósi þess að framkvæmdirnar eru fjarri lagi frá gildandi deiliskipulagi. Í stað þessara aðgerða mælist skipulagsráð eindregið til þess að umferð gangandi vegfarenda sem kemur frá Strandgötu og yfir Glerárgötu verði beint suður Glerárgötuna vestan megin og þaðan í átt að miðbæjarsvæðinu. Skoða þarf betur aðgerðir 6 og 8 að mati ráðsins.


Skipulagsráð telur nauðsynlegt að farið verði í aðgerðir til að auka umferðaröryggi á Hlíðarbraut þar sem fjöldi barna þvera götuna á leið í tómstundir og skólaíþróttir.


Skipulagsráð samþykkir jafnframt að farið verði í aðgerðir sem tilgreindar eru í minnisblaði Eflu verkfræðistofu til að minnka hraða og auka öryggi á Austursíðu. Er skipulagsfulltrúa falið að ákveða, í samráði við umhverfis- og mannvirkjasvið, til hvaða aðgerða verði gripið. Þar sem um bráðabirgðaaðgerðir er að ræða telur ráðið ekki þörf á að fara í breytingu á deiliskipulagi.