Tæplega 116 milljónir í frístundastyrki Akureyrarbæjar

Skautaíþróttin er ein af þeim íþróttagreinum sem njóta vinsælda hjá ungu kynslóðinni. Mynd af heimasíðu Skautafélags Akureyrar.

Árið 2023 nutu 2.703 börn og unglingar á aldrinum 6-17 ára góðs af frístundastyrk Akureyrarbæjar, eða tæplega 84% þeirra sem áttu rétt á styrknum, sem er 2% aukning frá árinu á undan.

Frístundastyrkur Akureyrarbæjar nam 45.000 krónum á hvern iðkanda árið 2023. Í heildina var tæplega 116 milljónum króna varið í frístundastyrki í 3.637 skráningum sem jafngildir styrk upp á 42.875 krónur að meðaltali á hvern iðkanda.

Kynjahlutfall skráninga var hér um bil jafnt, 50,3% drengir og 49,6% stúlkur. Nýtingin var áberandi mest hjá 10 og 11 ára börnum þar sem 92-95% af þeim aldurshópi notaðist við frístundastyrkinn í einhverri mynd, þar af voru 97% ellefu ára stúlkna sem voru skráðar með nýtingu árið 2023. Flestar skráningar, eða tæplega 37%, voru hjá Íþróttafélaginu Þór og Knattspyrnufélagi Akureyrar. Samstarfsaðilar (íþrótta-, æskulýðs og tómstundafélög auk fyrirtækja) sem tóku við frístundastyrk árið 2023 voru þrjátíu og níu.

Markmið með frístundastyrk Akureyrarbæjar er að styrkja börn og unglinga til þátttöku í uppbyggilegu frístundastarfi og auka möguleika til þátttöku óháð efnahag. Einnig að ýta undir aukna hreyfingu, virkni og félagsþátttöku sem og að vinna gegn óæskilegu brottfalli í eldri aldurshópum iðkenda.

Frístundastyrkur Akureyrbæjar árið 2024 er 50.000 krónur og gildir fyrir öll börn fædd árið 2007 til og með árinu 2018.

Minnisblað um frístundastyrk Akureyrarbæjar 2023.