Ævintýrið hefst á Listasumri á Akureyri með nýju merki og metnaðarfullum verkefnum

Ævintýrið hefst á Listasumri á Akureyri með nýju merki og metnaðarfullum verkefnum. Nýtt merki Listasumars á Akureyri eftir grafísku hönnuðina Heiðdísi Höllu Bjarnadóttur og Kristínu Önnu Kristjánsdóttur gefur loforð um litríkt og lifandi sumar þar sem sólin skín og spennandi hlutir gerast. Það má hverjum vera ljóst að það verður raunin þegar verkefnin 15 sem fengu styrk á Listasumri eru skoðuð en alls voru veittir styrkir að upphæð einni milljón króna. Listasumar tók höndum saman við Gilfélagið, Menningarfélag Akureyrar, Möguleikamiðstöðina í Rósenborg og ART Ak Amaro Gallerí og fólst samstarfið í að leggja fram vettvang til að koma saman skemmtilegri og spennandi dagskrá frá laugardeginum 24. júní þegar Listasumar verður sett og fram að Akureyrarvöku 26. ágúst. Verkefnin sem urðu fyrir valinu spanna hinar ýmsu listgreinar s.s. dans, ýmiskonar tónlistarstefnur, gjörninga, myndlist, ljóðlist og ritlist. Ekki er aðeins um staka viðburði að ræða heldur einnig listasmiðjur í ágúst fyrir ungu kynslóðina. 

Nánari upplýsingar um verkefnin sem urðu fyrir valinu og verða hluti af dagskrá Listasumars er að finna á slóðinni www.listasumar.is og einnig á facebooksíðu Listasumars.