Bæjarráð

Meirihluti bæjarráðs fagnar útkomu rannsóknar Önnu Elísu Hreiðarsdóttir lektors við HA og Svövu Bjargar Mörk lektors við HÍ sem þær gerðu á starfsumhverfi í leikskólum í kjölfar gjaldskrárbreytinga sem varð 1. janúar 2024 hjá Akureyrarbæ, sem fól í sér sex gjaldfrjálsa tíma. Við munum halda áfram að þróa gjaldskrárbreytingar í leikskólum en teljum þetta hafi verið afar góða breytingu og jákvæða þróun í starfsumhverfi í leikskólum á Akureyri bæði fyrir starfsfólk og börn.


Hilda Jana Gísladóttir S-lista og Ásrún Ýr Gestsdóttir V-lista óska bókað:

Mikilvægi rannsókna eru ótvíræð og ánægjulegt að fá kynningu á niðurstöðum á viðhorfum starfsfólks leikskóla til kerfisbreytinga á leikskólakerfinu á Akureyri. Niðurstöðurnar eru í samræmi við það sem lagt var upp með. Starfsfólk leikskóla er almennt jákvætt til breytinganna, meta m.a. að áhrifin fyrir börn séu jákvæð og að starfsaðstæður þeirra séu betri og að þeim líði betur.

Það er hins vegar áhyggjuefni að enn sem komið er séu ekki líka rannsökuð áhrif breytinganna á foreldra, enda erfitt að aðskilja velferð barna og fjölskyldna þeirra. Jafnréttisstofa hefur lagt áherslu á að meta þurfi áhrifin á ólíka hópa foreldra t.d. út frá kynjasjónarmiði, þjóðerni, hvort að um sé að ræða einstæða foreldra eða foreldra í sambúð. Til þess að tryggja jákvæða heildarniðurstöðu til framtíðar, sátt og stöðugleika, er mikilvægt að horfa einnig til þess og meta hvort og þá hvernig hægt sé að koma til móts við ólíka hópa.

Bæjarráð telur það forgangsverkefni að lífsgæðakjarni fyrir eldri borgara verði að veruleika og vísar því málinu til skipulagsráðs. Bæjarráð telur mikilvægt að lífsgæðakjarni verði hluti af aðalskipulagi sveitarfélagsins og verði á starfsáætlun skipulagsráðs árið 2025. Bæjarráð hyggst taka málið aftur til umræðu í janúar 2025 og meta með hvaða hætti best sé að fylgja málinu eftir, þannig að sem mestar líkur séu á því að lífsgæðakjarni verði að veruleika eins fljótt og auðið er.


Sunna Hlín Jóhannesdóttir B-lista óskar bókað:

Það er gott að fá þessa skýrslu sem er góð grunnvinna fyrir framhaldið. Það er heilmikil vinna eftir til að koma þessu verkefni á koppinn sem krefst náins samstarfs við ríkið og uppbyggingaraðila og mikilvægt að formfesta framhaldið og halda vinnu vinnuhópsins áfram.

Bæjarráð þakkar Svandísi Hlín Karlsdóttur framkvæmdastjóra viðskipta- og kerfisþróunar og Hlín Benediktsdóttur forstöðumanni verkundirbúnings og hönnunar hjá Landsneti fyrir komuna á fundinn.

Bæjarráð tekur undir bókun Samtaka sjávarútvegssveitarfélaga frá 22. október sl.