Glerárdalur - fólkvangur

Bæjarstjórn samþykkir með 11 samhljóða atkvæðum að stefnt skuli að því að hluti Glerárdals verði skilgreindur sem fólkvangur í samræmi við lög um náttúruvernd nr. 44/1999, gr. 55.

Bæjarstjórn samþykkir einnig með 11 samhljóða atkvæðum að gerð verði tillaga til Umhverfisstofnunar um mörk og nýtingarmöguleika fólkvangsins og gerð grein fyrir þeim takmörkunum sem ákvörðun um fólkvang kann að setja Akureyrarbæ sem rétthafa landsvæðisins.

Umhverfisnefnd þakkar Andra Teitssyni kynninguna.

Meirihluti umhverfisnefndar samþykkir tillögurnar og vísar málinu til skipulagsnefndar. Jón Ingi Cæsarsson S-lista sat hjá við afgreiðslu.

Jón Ingi Cæsarsson S-lista óskar bókað:

Undirritaður hefur starfað í starfshópi vegna Glerárdals. Ljóst er að sú niðurstaða sem nú liggur fyrir er mér ekki að skapi og í henni er fórnað meiri hagsmunum fyrir minni.

Helstu ástæður eru:

• Skorinn er stór hluti af vestanverðum dalnum frá fólkvangssvæðinu til að þjóna hagsmunum Fallorku með 3,3 Mw virkjun.
• Náttúrufræðistofnun Íslands sem er umsagnaraðili telur hugmyndir um virkjun rýra mjög gildi Glerárdals sem fólkvangs, reyndar telur hún virkjunarhugmyndir ósamrýmanlegar þeim áformum.
• Með því að stjórnmálamenn á Akureyri hafa gert bindandi samning við Fallorku um Glerá og Glerárdal hafa þeir í reynd tekið ákvörðun um að taka umsagnarréttinn af bæjarbúum hvað varðar deiliskipulagið. Ljóst að íbúum bæjarins er ekki ætlað að hafa áhrif á ákvörðun um virkjun við fólkvanginn.
• Rennsli Glerár verður mjög skert og áin því langt frá því sem hún er í dag inni á fólkvangssvæðinu. Þar með er eitt merkasta svæði á dalnum, Glerárgil með fossum sínum og skessukötlum ekki svipur hjá sjón til framtíðar.
• Vegna þess sem að ofan er greint, tel ég að anda afmælisgjafar sem bæjarfulltrúar á Akureyri gáfu bæjarbúum á afmælisfundinum 2012 sé fórnað. Á þeim fundi var tekin ákvörðun um fólkvang á Glerárdal og niðurstaðan sem hér er til umsagnar stendur því ekki undir þeim væntingum að mínu mati.

Ég mun því ekki taka þátt í afgreiðslu þessa máls í umhverfisnefnd.

Skipulagsnefnd þakkar Ómari Ívarssyni fyrir kynninguna.
Skipulagsnefnd gerir ekki athugasemd við tillögu starfshópsins um afmörkun fólkvangsins og ákvæði hennar að stofna fólkvang í Glerárdal og vísar tillögunni til afgreiðslu bæjarstjórnar.

Ólafur Jónsson D-lista lagði fram breytingartillögu svohljóðandi:

5. gr. Í stað þessara þriggja síðustu setninga: "Umferð hesta er heimil á stikuðum leiðum eða stígum. Heimilt er að nota hross við smölun. Óheimilt er að fara með rekstur hesta um fólkvanginn." komi þessi setning: "Heimilt er að fara á og með hesta um fólkvanginn."

7. gr. Í stað: "Hófleg sauðfjárbeit er heimil innan fólkvangsins." komi þessi setning: "Sauðfjárbeit er heimil innan fólkvangsins og ef þurfa þykir skal bæjarstjórn ákvarða ítölu."

Tillaga Ólafs Jónssonar var borin upp og felld með 4 atkvæðum Geirs Kristins Aðalsteinssonar L-lista, Guðmundar Baldvins Guðmundssonar B-lista, Loga Más Einarssonar S-lista og Sigurðar Guðmundssonar A-lista gegn 2 atkvæðum Ólafs Jónssonar D-lista og Víðis Benediktssonar L-lista.

Andrea Sigrún Hjálmsdóttir V-lista, Halla Björk Reynisdóttir L-lista, Hlín Bolladóttir L-lista, Oddur Helgi Halldórsson L-lista og Tryggvi Þór Gunnarsson L-lista sátu hjá við afgreiðslu.

Bæjarstjórn samþykkir tillögu starfshópsins með 10 samhljóða atkvæðum.

Ólafur Jónsson D-lista sat hjá við afgreiðslu.

Umhverfisnefnd þakkar kynninguna.

Jón Ingi Cæsarsson S-lista tók ekki þátt í umræðunum þar sem hann var einn af þeim aðilum sem skiluðu inn athugasemdum.

Umhverfisnefnd þakkar Hildi fyrir veittar upplýsingar um friðunarferlið. Nefndin felur Hildi að gera þær breytingar á 5. grein sem rætt var um á fundinum og kynna á ný.

Umhverfisnefnd samþykkir breytingarnar og vísar málinu til afgreiðslu í skipulagsnefnd.