Móahverfi - gatnagerð og lagnir - áfangi 1

Umhverfis- og mannvirkjaráð samþykkir að farið verði í stígagerðina í sátt við umhverfið og með lágmarks röskun á Langamel.

Umhverfis- og mannvirkjaráð samþykkir að taka lægsta tilboði frá G. Hjálmarssyni hf. að upphæð kr. 798.361.508.

Brynja Hlíf Þorsteinsdóttir L-lista bar upp vanhæfi og vék af fundi við afgreiðslu málsins.

Umhverfis- og mannvirkjaráð samþykkir sáttatillöguna fyrir sitt leyti.

Bæjarráð samþykkir sáttatillöguna.

Tillaga Sunnu Hlínar Jóhannesdóttur og Gunnars Más Gunnarsson var borin upp til atkvæða. Tillagan var felld með sex atkvæðum gegn fjórum atkvæðum Sunnu Hlínar Jóhannesdóttur, Gunnars Más Gunnarssonar, Hildu Jönu Gísladóttur og Jönu Salóme Ingibjargar Jósepsdóttur.

Jón Hjaltason óháður sat hjá.


Bæjarfulltrúar L-lista, D-lista og M-lista óska bókað:

Við teljum þessa tillögu ekki tímabæra þar sem enn er ekki komið í ljós hvort að tafir verði á afhendingu lóða í Móahverfi. Okkur þykir ekki forsvaranlegt að fara í kostnaðarsama úttekt þegar ekki liggur fyrir hvort að tafir verði. Verði hinsvegar eitthvað til þess að ekki náist að afhenda lóðir á tilsettum tíma er sjálfsagt að skoða það hvort að ástæða sé til óháðrar úttektar.

Umhverfis- og mannvirkjaráð samþykkir fyrir sitt leyti viðauka að upphæð kr. 200 milljónir og vísar viðaukanum til afgreiðslu í bæjarráði.


Hilda Jana Gísladóttir S-lista og Óskar Ingi Sigurðsson B-lista óska bókað:

Það er sérkennilegt að nauðsynlegt sé að óska eftir viðauka fyrir þessu verkefni nú, enda lá ljóst fyrir við gerð fjárhagsáætlunar þessa árs, að þörf væri á þessu fjármagni vegna uppbyggingar Móahverfis.

Bæjarráð samþykkir að gerður verði viðauki við fjárhagsáætlun vegna málsins og felur sviðsstjóra fjársýslusviðs að vinna viðaukann.


Sindri S. Kristjánsson S-lista óskar bókað:

Í máli þessu þarf meirihluti Sjálfstæðisflokks, Miðflokksins og L-lista litla aðstoð við að varpa ljósi á eigin klaufaskap við fjárhagsáætlunargerð bæjarins. Eins og gögn þessa máls sýna fram á var kostnaður við gatnagerð í Móahverfi vanáætlaður allt frá upphafi í fjárhagsáætlunargerð ársins 2024. Í þeirri vinnu lá fyrir að kostnaður vegna þessa verkefnis yrði aldrei undir 350 milljónum kr. en samt voru aðeins áætlaðar 250 milljónir kr. Miðað við þá áherslu sem meirihlutinn hefur lagt á að hið nýja hverfi byggist hratt og örugglega upp og að lóðaframboð í bænum sé ávallt fullnægjandi er þetta með talsverðum ólíkindum.