Sigurhæðir - sala húsnæðis

Stjórn Akureyrarstofu samþykkir að óska eftir því við umhverfis- og mannvirkjasvið að húsið Sigurhæðir verði sett í söluferli.

Vegna fjölmargra hugmynda um breytta notkun á húsnæði Sigurhæða felur bæjarráð Akureyrarstofu að rýna hugmyndirnar áður en til sölu kemur.

Í ljósi þess að fram hafa komið hugmyndir og áskoranir um að Sigurhæðir gegni áfram menningarlegu hlutverki samþykkir stjórn Akureyrarstofu að slá á frest hugmyndum um sölu hússins og felur starfsmönnum Akureyrarstofu að útbúa drög að auglýsingu þar sem kallað verði eftir hugmyndum um notkun og rekstur hússins. Í framlögðum hugmyndum komi m.a. fram um hvaða starfsemi ræðir, hvernig hún tengist sögu hússins, hvernig hún verði fjármögnuð og hvernig rekstur muni standa undir húsaleigu og föstum rekstrarkostnaði hússins

Stjórn Akureyrarstofu samþykkir auglýsinguna og felur deildarstjóra Akureyrarstofu að koma henni á framfæri.

Stjórn Akureyrarstofu felur deildarstjóra Akureyrarstofu að vinna úr umsóknum og leggja fram tillögu á næsta fundi.

Stjórn Akureyrarstofu felur deildarstjóra Akureyrarstofu að afla frekari gagna.

Við yfirferð á framlögðum hugmyndum og tilboðum um fyrirhugaða starfsemi gilti menningarlegt vægi 50% af mati og leigufjárhæð 50%.

Með hliðsjón af því samþykkir stjórn Akureyrarstofu að gengið verði til viðræðna við Hótel Akureyri um leigu á Sigurhæðum.

Stjórn Akureyrarstofu felur starfsmönnun að skoða með framhald málsins í ljósi stöðunnar.

Þar sem Hótel Akureyri hefur fallið frá tilboði sínu og ekki var búið að ganga frá samningi um leigu samþykkir stjórn Akureyrarstofu að fela deildarstjóra Akureyrarstofu að ganga til viðræðna við Kristínu Kjartansdóttur og Hlyn Hallsson sem áttu það tilboð sem metið var nr. 2 um leigu á Sigurhæðum.

Stjórn Akureyrarstofu felur starfsmönnum að vinna málið áfram og ræða við tilboðsgjafa vegna breyttra forsenda.

Í nóvember á síðasta ári voru Sigurhæðir auglýstar lausar til leigu og var þá bæði óskað eftir tilboðum í leiguverð sem og hugmyndum um nýtingu. Fjögur tilboð bárust og að loknu mati á þeim var ákveðið að ganga til viðræðna við rekstraraðila hótels um leigu á húsnæðinu. Í kjölfar COVID-19 faraldursins síðasta vetur dró sá aðili tilboð sitt til baka. Þegar það lá fyrir samþykkti stjórn Akureyrarstofu þann 28. maí 2020 að ganga til viðræðna við Kristínu Kjartansdóttur og Hlyn Hallsson um tilboð þeirra í leigu á Sigurhæðum en það var á sínum tíma metið númer tvö af innsendum tilboðum.


Hugmynd þeirra að nýtingu gerði ráð fyrir að búið yrði að staðaldri á efri hæð hússins og óskuðu þau eftir að breytingar yrðu gerðar á hæðinni til að það væri mögulegt. Við upprunalegt mat umhverfis- og mannvirkjasviðs Akureyrarbæjar (UMSA) var gert ráð fyrir að kostnaður við þær yrði 2,5 - 3 m.kr. Eitt af því sem kanna þurfti áður en ljúka mætti samningi um tilboðið var grunur um leka í þaki hússins. Við skoðun kom í ljós að ekki var um eiginlegan leka að ræða heldur raka í þakrými sem þéttist og skilaði sér niður í gegnum loft á efri hæð. Að mati sérfræðinga UMSA er unnt að kom í veg fyrir þetta með til þess að gera litlum tilkostnaði og aukinni loftun. Þetta þýðir að húsið liggur ekki undir skemmdum og er hæft til safna- og menningarstarfsemi.


Hins vegar er það jafnframt mat sérfræðinganna að til þess að mögulegt sé fyrir fjölskyldu að búa að staðaldri á efri hæð hússins þurfi að ráðast í mun meiri breytingar á þakinu og þakrými og auka loftun til muna vegna þess raka sem fylgir almennt búsetu fólks. Af þessum sökum mælir UMSA gegn því að búseta verði heimiluð í húsinu nema að ráðast fyrst í þær breytingar. Gróft mat á kostnaði við þær er að hann gæti numið á milli 15 og 25 m.kr.


Þetta þýðir að þær forsendur sem gefnar voru þegar hugmyndin og tilboðið var metið í öðru sæti í lok síðasta árs eru brostnar. Af þessum sökum getur stjórn Akureyrarstofu ekki haldið áfram viðræðum um tilboðið sem hefur mögulega búsetu sem forsendu.

Stjórn Akureyrarstofu samþykkir að húsið Sigurhæðir verði auglýst til leigu og felur starfsmönnum Akureyrarstofu að útbúa auglýsingu þar sem kallað verði eftir hugmyndum um notkun og rekstur hússins án búsetu. Í framlögðum hugmyndum komi m.a. fram um hvaða starfsemi ræðir, hvernig hún tengist sögu hússins, hvernig hún verði fjármögnuð og hvernig rekstur muni standa undir húsaleigu og föstum rekstrarkostnaði hússins. Við yfirferð á framlögðum hugmyndum og tilboðum mun fyrirhuguð starfsemi og menningarlegt vægi gilda 50% af mati og tilboð um leigufjárhæð 50%. Stjórn Akureyrarstofu mun annast matið.

Stjórn Akureyrarstofu felur starfsmönnum að ganga til samninga við Kristínu Þóru Kjartansdóttur f.h. Flóru menningarhúss ehf. um leigu á Sigurhæðum.

Stjórn Akureyrarstofu samþykkir samninginn.