Aðalskipulag Akureyrar 2018-2030 - ákvörðun um endurskoðun

Að mati skipulagsráðs er ekki tilefni til að hefja vinnu við heildarendurskoðun á gildandi aðalskipulagi Akureyrar í samræmi við 35. gr. skipulagslaga nr. 123/2010. Skipulagsráð telur þó ástæðu til að endurskoða kafla um íbúðabyggð auk þess að fella vinnu við endurskoðun atvinnustefnu að aðalskipulaginu.

Skipulagsráð samþykkir að fela skipulagsfulltrúa að útbúa erindisbréf til skipunar í starfshóp um endurskoðun Aðalskipulags Akureyrar 2018-2030.

Skipulagsráð samþykkir að skipa Höllu Björk Reynisdóttur L-lista, Sunnu Hlín Jóhannesdóttur B-lista og Þórhall Jónsson D-lista í vinnuhóp til endurskoðunar Aðalskipulags Akureyrar 2018-2030.

Frestað til næsta fundar skipulagsráðs 15. nóvember nk.

Skipulagsráð felur skipulagsfulltrúa að hefja vinnu við gerð lýsingar fyrir breytingu á aðalskipulagi Akureyrar 2018-2030 byggt á efni fyrirliggjandi minnisblaðs og umræðum á fundinum.


Jón Hjaltason óháður óskar bókað eftirfarandi:

(a) Undirritaður leggur áherslu á nauðsyn þess að hugsað sé langt fram í tímann og tekið frá ríflegt svæði við Kjarnagötu fyrir lífsgæðakjarna eldri borgara. Ákjósanlegri staður gefst vart í bæjarlandinu. Tveir slíkir kjarnar eru engin ofgnótt í sveitarfélagi sem um miðja 21. öld mun telja 30-40 þúsund íbúa.

(b) „Akureyri er landlítið sveitarfélag“, bendir vinnuhópurinn á. Því vill undirritaður að kannaður sé grundvöllur þess að leggja jarðir Akureyrarkaupstaðar í norðri, Blómsturvelli, Brávelli og Skjaldarvík, undir lögsagnarumdæmi hans. Eða það sem væri þó ef til vill enn betra fyrir hvoru tveggja sveitarfélögin, Akureyrarkaupstað og Hörgársveit, að lögð verði drög að sameiningu þeirra tveggja.


Þórhallur Jónsson D-lista óskar bókað eftirfarandi:

Ég tel að iðnaðarsvæði sem skipulagt er á Ytra Krossanesi verði fundinn annar staður og tekið verði tillit til áskorunar Meistarafélags byggingamanna á Norðurlandi um að breyta í íbúðasvæði. Eins gerir Svæðisskipulag Eyjafjarðar ráð fyrir að byggð þróist út með ströndinni til norðurs.

Skipulagsráð samþykkir fyrirliggjandi skipulagslýsingu með fyrirvara um breytingar til samræmis við umræður á fundi. Leggur ráðið til við bæjarstjórn að skipulagslýsingin verði samþykkt og hún kynnt skv. 1. mgr. 30. gr. skipulagslaga nr. 123/2010. Er miðað við að helstu atriði lýsingarinnar verði kynnt á opnum íbúafundi sem haldinn verður í Hofi þann 31. október nk.

Bæjarstjórn samþykkir skipulagslýsinguna með 11 samhljóða atkvæðum og að hún verði kynnt skv. 1. mgr. 30. gr. skipulagslaga nr. 123/2010. Einnig er miðað við að helstu atriði verði kynnt á opnum íbúafundi í Hofi næstkomandi fimmtudag.