Bæjarstjórn

Lögð fram tillaga Heimis Arnar Árnasonar D-lista um breytingu á skipan fulltrúa í kjörstjórn. Rúnar Sigurpálsson verði aðalmaður í stað Valdemars Karls Kristinssonar.

Lögð fram tillaga Heimis Arnar Árnasonar D-lista um breytingu á skipan fulltrúa í kjörstjórn. María Marinósdóttir verði varamaður í stað Ásgeirs Högnasonar.

Liður 2 í fundargerð bæjarráðs dagsettri 1. febrúar 2024:

Lögð fram til samþykktar stefna Akureyrarbæjar um íbúasamráð til 2026 ásamt aðgerðaáætlun. Bæjarráð samþykkti á fundi sínum 23. nóvember sl. að vísa stefnunni til kynningar og umsagnar í fastanefndum, ungmennaráði, öldungaráði og samráðshópi um málefni fatlaðs fólks.

Sumarliði Helgason sviðsstjóri þjónustu- og skipulagsviðs sat fund bæjarráðs undir þessum lið.

Bæjarráð samþykkir framlagða stefnu um íbúasamráð ásamt aðgerðaáætlun með fjórum atkvæðum og vísar málinu til umræðu og afgreiðslu bæjarstjórnar.

Hilda Jana Gísladóttir S-lista situr hjá.

Hilda Jana Gísladóttir S-lista, Sunna Hlín Jóhannesdóttir B-lista og Ásrún Ýr Gestsdóttir V-lista óska bókað:

Við teljum mjög mikilvægt að koma á laggirnar fjölmenningarráði Akureyrarbæjar og teljum við að það hefði átt að vera ein aðgerða stefnu um íbúasamráð.

Hlynur Jóhannsson kynnti málið.

Til máls tóku Jana Salóme Ingibjargar Jósepsdóttir, Hilda Jana Gísladóttir, Jón Hjaltason og Lára Halldóra Eiríksdóttir.

Liður 4 í fundargerð bæjarráðs dagsettri 1. febrúar 2024:

Lagðar fram reglur Akureyrarbæjar um verklag vegna uppljóstrana og vernd uppljóstrara. Reglurnar byggja á lögum um vernd uppljóstrara nr. 40/2020, en skv. 5. gr. laganna skal setja reglur um verklag við uppljóstrun starfmanna um lögbrot eða aðra ámælisverða háttsemi í fyrirtækjum eða á öðrum vinnustöðum þar sem eru 50 starfsmenn eða fleiri að jafnaði á ársgrundvelli.

Bæjarráð samþykkir framlagðar reglur um verklag vegna uppljóstrana og vernd uppljóstrara og vísar þeim til umræðu og afgreiðslu bæjarstjórnar.

Hulda Elma Eysteinsdóttir kynnti.

Liður 6 í fundargerð bæjarráðs dagsettri 14. desember 2023:

Liður 6 í fundargerð bæjarstjórnar dagsettri 5. desember 2023:

Liður 7 í fundargerð skipulagsráðs dagsettri 15. nóvember 2023:

Erindi dagsett 3. nóvember 2023 þar sem Fanney Hauksdóttir f.h. atNorth ehf. sækir um lóð við Hlíðarvelli sem í deiliskipulagi er merkt sem lóð B og er staðsett austan núverandi lóðar fyrirtækisins. Umrædd lóð er 7.882 m² að stærð með nýtingarhlutfall 0,5.

Meðfylgjandi er greinargerð og afstöðumynd.

Sunna Hlín Jóhannesdóttir B-lista, Sindri Kristjánsson S-lista og Sóley Björk Stefánsdóttir V-lista leggja fram eftirfarandi tillögu að bókun:

Skipulagsráð frestar afgreiðslu og vísar erindinu til bæjarráðs sem hefur með atvinnumál að gera.

Tillagan var felld með fjórum atkvæðum gegn einu atkvæði Sóleyjar Bjarkar Stefánsdóttur V-lista.

Meirihluti skipulagsráðs leggur til við bæjarstjórn að lóð B við Hlíðarvelli 1 verði úthlutað til atNorth ehf. án auglýsingar.

Sóley Björk Stefánsdóttir situr hjá við afgreiðslu málsins.

Sunna Hlín Jóhannesdóttir B-lista, Sóley Björk Stefánsdóttir V-lista og Sindri Krisjánsson S-lista óska bókað eftirfarandi:

Við teljum skipulagsráð ekki hafa forsendur að svo stöddu til að taka upplýsta ákvörðun um áframhaldandi uppbyggingu gagnavera á Akureyri. Sveitarfélagið þarf að setja sér stefnu varðandi uppbyggingu gagnavera í bæjarlandinu. Það liggur ekki fyrir hversu orkufrek þessi uppbygging er og hvert svigrúmið er þá til annarra stórnotenda sem mögulega hefðu hug á atvinnuuppbyggingu á svæðinu.

Halla Björk Reynisdóttir kynnti.

Bæjarstjórn vísar málinu til umræðu í bæjarráði, sem fer með atvinnumál fyrir hönd bæjarstjórnar.

Fyrir fundi bæjarráðs liggur greinargerð Eyjólfs Magnúsar Kristinssonar forstjóra atNorth dagsett 10. desember 2023.

Pétur Ingi Haraldsson skipulagsfulltrúi sat fund bæjarráðs undir þessum lið.

Bæjarráð frestar málinu til næsta fundar bæjarráðs.

Pétur Ingi Haraldsson skipulagsfulltrúi sat fund bæjarráðs undir þessum lið.

Deiliskipulag fyrir svæði AT16 var samþykkt í mars 2022 og var atNorth ehf. úthlutað lóð að Hlíðarvöllum 1 undir gagnaver samkvæmt viljayfirlýsingu bæjarstjórnar. Í deiliskipulaginu segir að lóðin Hlíðarvellir 1, merkt A í deiliskipulagi sé fyrir fyrsta áfanga gagnavers sem gefur möguleika á stækkun lóðar en einnig segir að sameina megi lóðir A, B og C án deiliskipulagsbreytingar. Bæjarráð samþykkir að leggja til við bæjarstjórn að úthluta lóð að Hlíðarvöllum 3, merkt B í deiliskipulagi, án auglýsingar, með vísan til 2.3. gr. í reglum um úthlutun lóða, þar sem deiliskipulag svæðisins er unnið með frekari stækkun gagnaversins í huga. Leggur bæjarráð einnig til við bæjarstjórn að gatnagerðargjald verði 15% sbr. heimild 1. mgr. 5.2. gr. í gjaldskrá gatnagerðar- og byggingarréttargjalda í Akureyrarbæ nr. 24/2024.

Sunna Hlín Jóhannesdóttir B-lista, Hilda Jana Gísladóttir S-lista og Jana Salóme Ingibjargar Jósepsdóttir V-lista óska bókað:

Víð ítrekum þá afstöðu að mikilvægt er að Akureyrarbær setji sér stefnu varðandi uppbyggingu gagnavera í sveitarfélaginu og í framhaldinu hvort að tilefni sé til þess að endurskoða deiliskipulagið, en það gerir ráð fyrir áframhaldandi uppbyggingu gagnavera á lóðum C, D og E. Í þeirri vinnu væri æskilegt að tekið verði upp víðtækara samtal við hlutaðeigendur á starfssvæði SSNE um uppbyggingu gagnavera á svæðinu til framtíðar, þar sem ýmislegt bendir til þess að Norðurland verði ákjósanlegur kostur gagnavera í framtíðinni.

Hlynur Jóhannsson kynnti.

Til máls tóku Hilda Jana Gísladóttir, Jón Hjaltason, Andri Teitsson og Sunna Hlín Jóhannesdóttir.

Liður 6 í fundargerð skipulagsráðs dagsettri 31. janúar 2024:

Lögð fram tillaga að breytingu á deiliskipulagi sem nær til lóða við Viðjulund 1 og 2 þar sem gerðar hafa verið breytingar til að koma til móts við samþykkt skipulagsráðs frá 25. október 2023. Þær breytingar sem gerðar hafa verið eru eftirfarandi:

- Vestara húsið á lóðinni lækkar úr 7 hæðum í 6 hæðir.

- Felld eru út ákvæði um uppgefinn fjölda íbúða í hvoru húsi.

- Ákvæði um fjölda bílastæða breytast til samræmist við ákvæði Hagahverfis og Móahverfis.

- Bil milli byggingarreita minnkar úr 9 í 7 m.

- Bætt er við ákvæði um að svalir og skyggni megi standa 1,5 m út fyrir byggingarreit.

- Sett er inn kvöð um girðingu meðfram vesturlóðarmörkum til að lækka vindhraða.

Skipulagsráð leggur til við bæjarstjórn að fyrirliggjandi breyting á deiliskipulagi sem nær til lóða við Viðjulund 1 og 2 verði samþykkt með þeim breytingum sem tilgreindar eru nema breytingu sem felur í sér að bil byggingarreita minnki úr 9 m í 7 m. Ráðið leggur einnig til að tillaga að svörum við innkomnum athugasemdum verði samþykkt.

Jón Hjaltason óflokksbundinn situr hjá við afgreiðslu málsins.

Andri Teitsson kynnti.

Til máls tóku Jana Salóme Ingibjargar Jósepsdóttir og Jón Hjaltason.

Liður 9 í fundargerð skipulagsráðs dagsettri 31. janúar 2024:

Erindi Ágústs Hafsteinssonar og Lilju Filippusdóttur dagsett 25. janúar 2024, f.h. umhverfis- og mannvirkjasviðs Akureyrarbæjar, þar sem óskað er eftir að gerð verði breyting á deiliskipulagi Glerár. Í breytingunni felst að gert er ráð fyrir að fyrirhuguð göngubrú yfir Glerár, vestan Hörgárbrautar, hliðrist um 50 m til austurs.

Skipulagsráð leggur til við bæjarstjórn að deiliskipulagsbreytingin verði samþykkt og að hún verði auglýst skv. 1. mgr. 41. gr. skipulagslaga nr. 123/2010. Ekki er talin þörf á að útbúa lýsingu eða kynna vinnslutillögu skv. 3. og 40. mgr. 40. gr. skipulagslaga.

Brynja Hlíf Þorsteinsdóttir kynnti.

Liður 22 í fundargerð skipulagsráðs dagsettri 31. janúar 2024:

Erindi Guðbrands Sigurðssonar dagsett 25. janúar 2024, f.h. Brynju leigufélags, þar sem óskað er eftir að fá úthlutað lóðinni Heiðarmóa 10-14. Er jafnframt óskað eftir breytingu á deiliskipulagi á þann veg að á lóðinni megi byggja 6 tveggja herbergja íbúðir. Er umsóknin í samræmi við samkomulag félagsins og Akureyrarbæjar frá því í ágúst 2022 um að bæta við 32 íbúðum við leigusafnið á tímabilinu 2022 til 2026.

Skipulagsráð leggur til við bæjarstjórn, með vísun í samkomulag við Brynju leigufélag frá því í ágúst 2022, að lóðinni verði úthlutað til Brynju leigufélags án auglýsingar.

Með fyrirvara um samþykki bæjarstjórnar, samþykkir skipulagsráð jafnframt að gerð verði breyting á deiliskipulagi til samræmis við fyrirliggjandi erindi um fjölgun íbúða. Ekki er samþykkt að gerð verði breyting á fyrirliggjandi gatnahönnun. Að mati ráðsins er breytingin óveruleg skv. 2. mgr. 43. gr. skipulagslaga og er samþykkt að hún verði samþykkt án grenndarkynningar með fyrirvara um jákvæða umsögn Norðurorku og umhverfis- og mannvirkjasviðs Akureyrarbæjar.

Hulda Elma Eysteinsdóttir kynnti.

Ásthildur Sturludóttir bæjarstjóri fór yfir helstu atriði í störfum sínum frá síðasta fundi bæjarstjórnar.