Skólanefnd

Sólveig Jónasdóttir verkefnisstjóri á skóladeild kom á fundinn og kynnti stöðu verkefnisins Frístundaskóli á Akureyri.

Sesselja Sigurðardóttir leikskólaráðgjafi kom á fundinn og gerði grein fyrir stöðu innritunar í leikaskóla 2012 eins og hún liggur fyrir nú í lok júní.
Búið er að innrita 292 börn af árgangi 2010 í leikskólana. Í dag eru skráð 328 börn með lögheimili á Akureyri, voru 316 í janúar 2012. Skráðum börnum á leikskólaaldri hefur fjölgað úr 1132 í janúar 2012 í 1141 nú í júní.
Alls eru 14 börn nú á biðlista, tveggja ára og eldri, sem bíða eftir svari um leikskólapláss. Gera má ráð fyrir að bæta þurfi við 1,0 stöðugildi til að hægt verði að anna þeirri eftirspurn. Kostnaðurinn nemur um 1.5 millj. frá 1. sept. til loka ársins eða um 4,5 millj. á ársgrundvelli. Ennþá eru að berast umsóknir um leikskólapláss svo hugsanlega má búast við að fleiri börn bætist í hópinn þegar fram líða stundir.
Óskað er eftir heimild til að ráða í 1,0 stöðugildi til að anna eftirspurn eftir leikskólaplássum fyrir tveggja ára og eldri.

Lagt fram minnisblað ódagsett frá Hrafnhildi G. Sigurðardóttur þar sem óskað er eftir aukningu um 1,5 stöðugildi vegna sérkennslu leikskólabarna á árinu 2012. Áætlaður kostnaður er 7,2 millj.
Meginástæða þess að fjölga þarf stöðugildum á yfirstandandi ári er að tvö börn hafa flutt í bæinn nú í vor sem þurfa mikla sérkennslu og tvö börn til viðbótar hafa þurft sérkennslu vegna alvarlegra veikinda. Að auki eru tvö ung börn að byrja í leikskóla með greiningu sem kallar á mikla sérkennslu. Einnig hefur verið óskað eftir þjónustu fyrir eitt fjölfatlað barn.

Erindi dags. 30. maí 2012 frá 11 leikskólastjórum á Akureyri þar sem farið er fram á að skólayfirvöld og rekstraryfirvöld leikskóla Akureyrarbæjar endurskoði ákvörðun sína um að fagmenntað starfsfólk í leikskólum Akureyrar sé að hámarki 90% af heildarfjölda starfsmanna á deild.

Bæjarráð vísaði á fundi sínum 14. júní 2012 fjárhagsrömmum fyrir árið 2013 til umfjöllunar í nefndum bæjarins og óskaði eftir athugasemdum fyrir 18. ágúst nk.

Erindi dags. 7. júní 2012 frá Björk Ólafsdóttur þar sem Akureyrarbæ og Lundarskóla er þakkað fyrir þátttöku í tilraunaverkefni um ytra mat.
Þar kemur fram að nú þegar matsteymið hefur skilað af sér niðurstöðum með skilafundi og skýrslu þá kemur til kasta sveitarfélagsins, eða skólanefndar/skóladeildar í umboði þess, að fylgja niðurstöðunum eftir og sjá til þess að skólinn vinni með þær tillögur sem settar voru fram af matsaðilum.
Meðfylgjandi er skýrsla matsaðila um starfsemi Lundarskóla en þar fær skólinn almennt jákvætt mat.

Lögð fram til kynningar skýrsla sem unnin var fyrir mennta- og menningarmálaráðuneytið um íþróttakennslu í grunnskólum landsins. Byggir skýrslan á niðurstöðum könnunar sem gerð var á tímabilinu febrúar-mars 2012.