Skólanefnd

Guðríður Friðriksdóttir framkvæmdastjóri Fasteigna Akureyrarbæjar mætti á fundinn og gerði grein fyrir stöðu framkvæmda við Naustaskóla, en einnar hæðar kennsluálma á að vera fullbúin 1. ágúst 2012.

Fyrir fundinn voru lögð drög að reglum um skólaakstur í Akureyrarbæ, með tilvísan til erindis um skólaakstur úr Innbænum frá Litla Garði í Naustaskóla. Einnig var tekið fyrir erindi frá íbúum í Litla Garði vegna akstur nemenda í Naustaskóla.

Til kynningar var farið yfir breytingar sem voru gerðar á fjárhagsáætlun fræðslu- og uppeldismála vegna lækkunar á tryggingagjaldi.

Erindi dags. 15. september 2011 þar sem foreldrar barna í Grímseyjarskóla krefjast þess að sem fyrst verði gengið frá kaupum á borðum og stólum í sal Múla sem sé auðvelt að flytja úr salnum, þannig að þar verði hægt að sinna íþróttakennslu.
Erindið var sent til stjórnar Fasteigna Akureyrarbæjar í samræmi við samþykkt skólanefndar frá fundi í maí 2011. Stjórn Fasteigna Akureyrarbæjar samþykkti á fundi sínum 4. nóvember 2011 að heimila kaup á búnaði í sal Múla fyrir allt að 120 manns. Búið er að fá verð í þann búnað sem kemur til greina og hafa tillögur verið sendar til Grímseyjar til umsagnar. Þá hefur komið fram að félagasamtök í Grímsey eru tilbúin til að leggja fram allt að 500.000 kr. til kaupa á búnaðinum.

Fyrir fundinn var lögð skýrsla sem unnin var úr daggæslukönnun sem lögð var fyrir foreldra sem voru með börn í daggæslu vorið 2011. Helstu niðurstöðurnar eru eftirfarandi:
Foreldrum 172 barna var boðið að taka þátt í könnuninni. 126 svöruðu spurningalista eða
73,3%.
Í meginatriðum virðist vel staðið að daggæslukerfinu af hálfu Akureyrarbæjar.
Yfir 80% foreldra hefur nýtt sér upplýsingar af vef skóladeildar um dagforeldra. Niðurstöður
benda einnig til þess að almennt finnist foreldrum upplýsingarnar ítarlegar.
Ábendingum og ráðleggingum til foreldra og dagforeldra varðandi daggæslu í heimahúsum,
sem komið er á framfæri af hálfu skóladeildar, virðist vera vel fylgt ýmist að frumkvæði
dagforeldranna sjálfra eða að foreldrar leiti eftir því.
Tiltölulega óalgengt er að ágreiningur verði milli foreldra og dagforeldra. Í þeim fáu tilfellum
er upp komu tókst að greiða vel úr málum.
Almennt virðast foreldrar mjög ánægðir með þjónustu dagforeldra.
Þættir sem vekja mesta ánægju foreldra við þjónustu dagforeldra er framkoma dagforeldris
og hvernig tekið er á móti barninu að morgni.
Foreldrar segja að dagforeldrar leggi sig fram um að koma til móts við þarfir og væntingar
þeirra.
Talsvert ber á því að foreldrar kvarti undan því að vistunartími hjá dagforeldri bjóði ekki upp á
nægilegan sveigjanleika í upphafi og lok dags.
Forföll hjá dagforeldri geta verið nokkurt áhyggjuefni fyrir foreldra. Forföll koma niður á
annarri bindingu foreldra, s.s. vinnu eða námi. Álykta má að dagforeldrar þurfi að standa
betur að því að leita leiða til að draga úr óþægindum foreldra af völdum forfalla og að þeir
séu vel upplýstir um hvernig staðið sé að greiðslum ef til forfalla kemur.
Afstaða foreldra til þess að velja á milli leikskóla og daggæslu í heimahúsi fyrir barn sitt ræðst
mjög af viðhorfi þeirra til þjónustu dagforeldra eða þeirri reynslu sem þeir telja sig hafa af
þjónustukaupum af dagforeldri.

Fyrir fundinum lá tillaga að endurskoðuðum rammasamningi Háskólans á Akureyri og Akureyrarkaupstaðar um samstarf og samningi um þjónustu við leik- og grunnskóla, rannsóknir og úttektir.
Núgildandi samningar voru undirritaðir árið 2008 og renna út 1. desember 2011. Samningarnir framlengjast til árs í senn hafi þeim ekki verið sagt upp fyrir samningslok.
Að fenginni reynslu og vegna breytinga sem orðið hafa í HA frá því að þessir samningar voru gerðir, eru tillögur að breytingum lagðar fram.

Fyrir fundinn voru lagðar upplýsingar um stöðu innheimtumála á skóladeild og til samanburðar fjöldi þeirra sem skulda þrjá mánuði eða meira nú miðað við stöðuna í mars í vor. Þar kemur fram að heildarskuldir hafa ekki aukist en fleiri foreldrar með börn í grunnskólum skulda 3 mánuði eða meira nú, en það hefur ekki orðið breyting á fjölda foreldra sem eiga börn í leikskólum, sem skulda 3 mánuði eða meira.