Skipulagsráð

Á fundinn mættu Jón Birgir Gunnlaugsson verkefnastjóri á umhverfis- og mannvirkjasviði og Johan Wilhelm Holst skógfræðingur og skógræktarbóndi á Silfrastöðum í Skagafirði sem kynnti skógræktarskipulag sem hann hefur unnið vegna Græna trefilsins. Þar koma fram tillögur hans að svæðaskiptingu, trjátegundum á hvert svæði, stígagerð og áætluðum kostnaði.

Arnar Birgir Ólafsson hjá Teiknistofu Norðurlands kynnti stöðu mála í vinnu við endurskoðun á stefnu um stígakerfi innan sveitarfélagsins.

Lögð fram til kynningar drög að starfsáætlun skipulagssviðs fyrir árið 2020.

Lögð fram tillaga skipulagssviðs að aðgerðaáætlun vegna velferðarstefnu Akureyrarbæjar.

Lagt fram erindi Karólínu Gunnarsdóttur, dagsett 20. maí 2019, f.h. fjölskyldusviðs, þar sem óskað er eftir að skipulagsráð vinni að því að gera ráð fyrir fjórum 50-60 m² einbýlishúsum í skipulagi til að mæta þörfum ákveðins hóps sem ekki getur búið í fjölbýli.

Lagt fram minnisblað Teiknistofu Arkitekta dagsett 8. maí 2019 þar sem gerð er tillaga að breytingu á deiliskipulagi Hagahverfis. Er meðal annars gerð tillaga um að sameina lóðir og byggingarreit Kjarnagötu 61 og Halldóruhaga 1 og að á reit sem afmarkast af Halldóruhaga, Kristjánshaga, Jóninnuhaga og Kjarnagötu verði lóðum fækkað úr 4 í 2 og gert ráð fyrir að lágmarksfjöldi íbúða fari úr 32 í 36. Þá er einnig gert ráð fyrir að hámarks húsdýpt verði 10 m þó svo að byggingarreitir séu 12 m.

Lögð fram að lokinni grenndarkynningu tillaga að breytingu á deiliskipulagi sem nær til Gránufélagsgötu 4. Í breytingunni felst að nýtingarhlutfall hækkar úr 3.0 í 3.82, að heimilt verði að láta svalir ná allt að 1 m út fyrir byggingarreit á 2.- 4. hæð, hámarkshæð verður 16,3 í stað 15,8 auk þess sem afmörkun og stærð lóðar breytist lítillega til samræmis við lóðablað og það sama á við um byggingarreit.

Engin athugasemd barst á kynningartíma.

Erindi móttekið 15. maí 2019 þar sem Jón Páll Tryggvason fyrir hönd B.E. Húsbygginga ehf., kt. 490398-2529, sækir um framlenginu á framkvæmdafresti til eins árs á lóðinni nr. 1 við Gudmannshaga. Fresturinn rennur út 7. júní nk.

Lagt fram erindi Steingríms Péturssonar dagsett 24. maí 2019, f.h. Furuvalla 7 ehf., kt. 530212-0170, þar sem óskað er eftir að framkvæmdafrestur á lóðinni Austurbrú 10-12 verði framlengdur til 1. desember 2019.

Erindi dagsett 2. maí 2019 þar sem Sigurður Björgvin Björnsson fyrir hönd BB bygginga ehf., kt. 550501-2280, sækir um lóð nr. 3 við Kristjánshaga. Meðfylgjandi er yfirlýsing viðskiptabanka.

Byggingarfulltrúi óskar umsagnar skipulagsráðs á fráviki frá deiliskipulagi lóðarinnar vegna erindis sem dagsett er 14. maí 2019 þar sem Fanney Hauksdóttir fyrir hönd Ágústar Torfa Haukssonar og Evu Hlínar Dereksdóttur sækir um byggingarleyfi fyrir viðbyggingu við hús nr. 1 við Fannagil samkvæmt teikningum eftir Fanneyju Hauksdóttur.

Meðfylgjandi er samþykki nágranna.

Lögð fram fyrirspurn G. Odds Víðissonar arkitekts dagsett 24. maí 2019, f.h. Festi hf., kt. 540206-2010, um hvort að heimilt verði að koma fyrir allt að 10 hótelíbúðum á 2. og 3. hæð Tryggvabrautar 18 fyrir skammtímaleigu. Áfram yrði gert ráð fyrir verslun á jarðhæð.

Byggingarfulltrúi óskar umsagnar skipulagsráðs á erindi dagsettu 15. maí 2019 þar sem Ingólfur Guðmundsson fyrir hönd Rannveigar Elíasdóttur og Hjörleifs Arnar Jónssonar sækir um byggingarleyfi fyrir endurbótum á húsi nr. 17 við Goðabyggð. Jafnframt óskað eftir að byggja við 1. hæð til vesturs, að Mýrarvegi. Meðfylgjandi eru teikningar eftir Valþór Brynjarsson.

Lögð fram til kynningar tillaga að verklagsreglum um leyfisveitingar fyrir gáma sem samþykkt var á fundi skipulagsráðs 13. september 2017. Verklagsreglurnar hafa þó ekki tekið gildi þar sem þær hafa ekki verið samþykktar í bæjarstjórn.

Lögð fram til kynningar fundargerð 723. fundar, dagsett 17. maí 2019, með fullnaðarafgreiðslum erinda. Fundargerðin er í 9 liðum og er að finna á heimasíðu Akureyrarbæjar.