Skipulagsráð

Lagður fram til kynningar úrskurður úrskurðarnefndar umhverfis- og auðlindamála frá 4. september sl. í máli nr. 66/2017 vegna ákvörðunar skipulagsráðs frá 10. maí 2017 um að synja umsókn um breytingu á deiliskipulagi Innbæjarins vegna lóðar nr. 12b við Aðalstræti. Niðurstaða úrskurðarnefndarinnar er að skipulagsráð hafi ekki haft vald til að synja deiliskipulagsbreytingunni heldur eingöngu að koma með tillögu að afgreiðslu til bæjarstjórnar. Það hefur því ekki verið tekin lokaákvörðun í málinu og þarf bæjarstjórn því að taka málið til efnislegrar afgreiðslu.

Lögð fram tillaga sviðsstjóra skipulagssviðs að fjárhagsáætlun fyrir árið 2019.

Lögð fram drög að starfsáætlun skipulagsráðs fyrir árið 2019.

Lögð fram til kynningar tillaga að deiliskipulagi Holtahverfis norður, svæðis sem í aðalskipulagi er merkt sem ÍB17 og ÍB18 auk VÞ17. Afmarkast deiliskipulagssvæðið af Undirhlíð í suðaustri, Hörgárbraut í suðri, Hlíðarbraut og athafnasvæði í Krossaneshaga í vestri, Krossanesbryggju í norðri, strandlengjunni að norðan og iðnaðar- og hafnarsvæðinu við Sandgerðisbót að austan. Stærð svæðisins er 42,3 ha að flatarmáli.

Lögð fram að nýju tillaga að deiliskipulagi 3. áfanga Hálanda í landi Hlíðarenda. Deiliskipulagið var samþykkt í bæjarstjórn að lokinni auglýsingu þann 19. júlí sl. með minniháttar breytingum eftir auglýsingu. Fyrir liggur bréf Skipulagsstofnunar dagsett 31. ágúst 2018 þar sem ekki er gerð athugasemd við að birt verði auglýsing um gildistöku deiliskipulagsins í B-deild Stjórnartíðinda en með fyrirvara um lagfæringar á gögnum. Er tillagan nú lögð fram með þeim breytingum að hæðarkótum húsa hefur verið bætt inn á skipulagsuppdrátt, misræmi í texta lagfært auk þess sem bætt hefur verið við skýringaruppdrætti með þversniðum í landið. Þessu til viðbótar óskar umsækjandi eftir að gerð verði minniháttar breyting á kafla 1.9.4 í greinargerð varðandi útlit og byggingarefni húsa á svæðinu.

Lagt fram erindi dagsett 28. ágúst 2018 þar sem Árni Jón Elíasson fyrir hönd Landsnets ehf., kt. 630204-3480, leggur inn fyrirspurn varðandi Hólasandslínu 3 og fyrirhugaða legu hennar í streng við suðurenda Akureyrarflugvallar. Meðfylgjandi er mynd sem sýnir fyrirhugaða legu strengsins.

Lagt fram til kynningar minnisblað Landslags dagsett 10. ágúst 2018 um vinnu við rammaskipulag fyrir nýtt íbúðarsvæði norðan og vestan Síðuhverfis, svæði merkt sem ÍB23 í nýsamþykktu aðalskipulagi.

Lagt fram að nýju erindi dagsett 5. júlí 2018 þar sem Steingrímur Pétursson fyrir hönd Furuvalla 7 ehf., kt. 530212-0170, sækir um frest á byggingarframkvæmdum við fjölbýlishúsið Austurbrú 10-12 til 1. júní 2019. Afgreiðslu málsins var frestað á fundi skipulagsráðs 25. júlí sl. og sviðsstjóra skipulagssviðs og byggingarfulltrúa falið að leita nánari skýringa á stöðu málsins. Var haldinn fundur með verktaka og framkvæmdaraðila þann 27. ágúst sl. Þá er jafnframt lagt fram bréf Jóns Bjarna Kristjánssonar hdl. dagsett 23. júlí 2018, f.h. eigenda fasteignar að Hafnarstræti 82, þar sem mótmælt er að veittur verði frestur til að hefja framkvæmdir á lóðinni.

Erindi dagsett 30. ágúst 2018 þar sem Friðrik Smárason fyrir hönd Gleypis ehf., kt. 621209-3370, sækir um að hús nr. 19 við Gránufélagsgötu verði skráð sem atvinnuhúsnæði til gistingar.

Erindi dagsett 31. ágúst 2018 þar sem Helgi Sveinn Ingólfsson og Birgitta Halldórsdóttir leggja inn fyrirspurn vegna byggingar bílskúrs við hús nr. 27a við Eyrarveg. Meðfylgjandi eru teikningar.

Lögð fram til kynningar fundargerð 689. fundar, dagsett 23. ágúst 2018, með fullnaðarafgreiðslum erinda. Fundargerðin er í 6 liðum og er að finna á heimasíðu Akureyrarbæjar.

Lögð fram til kynningar fundargerð 690. fundar, dagsett 30. ágúst 2018, með fullnaðarafgreiðslum erinda. Fundargerðin er í 4 liðum og er að finna á heimasíðu Akureyrarbæjar.

Lögð fram til kynningar fundargerð 691. fundar, dagsett 6. september 2018, með fullnaðarafgreiðslum erinda. Fundargerðin er í 5 liðum og er að finna á heimasíðu Akureyrarbæjar.