Bæjarráð

Bæjarráð vísar fjárhagsáætlun 2024-2027 til fyrri umræðu í bæjarstjórn.

Bæjarráð samþykkir gjaldskrá Hlíðarfjalls fyrir sitt leyti og vísar henni til afgreiðslu í bæjarstjórn.

Bæjarráð samþykkir endurskoðaða upplýsinga- og vefstefnu Akureyrarbæjar ásamt áætlun um aðgerðir út næsta ár og vísar til umræðu og afgreiðslu í bæjarstjórn. Markmið upplýsinga- og vefstefnunnar er einkum að tryggja gagnsæi og að almenningur hafi greiðan aðgang að upplýsingum um sveitarfélagið. Þá rammar stefnan jafnframt inn helstu áherslur og leiðbeiningar um notkun á vefjum sveitarfélagsins.

Bæjarráð samþykkir framlagðar tillögur að breytingum á úthlutunar- og vinnureglum Menningarsjóðsins.

Bæjarráð samþykkir að veita Sinfóníuhljómsveit Norðurlands afmælisstyrk upp á eina og hálfa milljón króna til kaupa á nýrri hörpu. Harpan mun bæði nýtast í tónleikahald og kennslu.


Bæjarráð óskar meðlimum og aðstandendum sinfóníuhljómsveitarinnar, og Norðlendingum öllum, til hamingju með 30 ára afmæli hljómsveitarinnar sem er og hefur verið eitt af flaggskipum menningarlífs á Norðurlandi.

Bæjarráð vísar til fyrri bókunar 11. maí sl. og umsagnar skipulagsfulltrúa dagsett 12. maí sl. um sama mál, þegar frumvarpið var lagt fram í fyrra sinn. Bæjarráð leggur sem fyrr áherslu á að Akureyrarbær hefur áhuga á að taka þátt í að leita lausna varðandi húsnæðisvanda fyrir hælisleitendur í góðri samvinnu við ríkið, en telur varhugavert að tímabundið leyfi verði gefið til búsetu á atvinnusvæðum. Ekki er nægilega ljóst hvaða fordæmi verið er að setja með þessum breytingum. Bæjarráð telur að verði farið af stað með slíkar breytingar megi gera ráð fyrir þrýstingi um að slík leyfi verði framlengd og leiði mögulega til varanlegrar búsetu á svæðum sem ekki hafa verið skipulögð sem slík. Þá telur bæjarráð að skoða þurfi vel hvort og þá hvernig þessi breyting ef af verður hefur áhrif á þjónustu sveitarfélaga og að skýrari grein verði gerð fyrir því hvaða afsláttur verði gefinn á kröfum til íbúðarhúsnæðis á atvinnusvæðum.

Bæjarráð fagnar framkominni þingsályktunartillögu um fasta starfsstöð á Akureyri fyrir eina af þyrlum Landhelgisgæslunnar. Að mati bæjarráðs væri þetta skynsamleg og löngu tímabær ráðstöfun til þess að tryggja betur öryggi fólks víða um land. Ekki er æskilegt að hafa allar þyrlur gæslunnar á sama svæðinu með tilliti til óveðurs, náttúruhamfara og annarra skakkafalla auk þess sem slíkt fyrirkomulag tryggir illa fullnægjandi þjónustu við fjarlægari landshluta, einkum Norður- og Austurland. Mikil tækifæri felast í tengingu við sjúkraflugið sem er staðsett á Akureyri og augljós samlegðaráhrif þegar kemur að mönnun og þjónustu við sjúkraflug og þyrlu.

Bæjarráð vísar til umsagnar Akureyrarbæjar frá 29. ágúst 2023 þegar drög að reglunum voru lögð fyrir bæjarráð:


"Akureyrarbær gerir athugasemdir við eftirfarandi í drögunum:

Að ekki sé gert ráð fyrir rafrænni íbúakosningu en þarna er tilvalið tækifæri til þess að hafa rafræna kosningu með tilkomu rafrænna skilríkja eða í það minnsta að hafa slíkan valkost. Sú framkvæmd sem reglugerðin kveður á um nýtist sveitarfélögum illa nema íbúakosning fari fram samhliða öðrum kosningum, s.s. sveitarstjórnarkosningum.

Framkvæmdin sem þarna er lögð til er ekki til þess fallin að styðja við þá þróun og stefnu sem rafrænum lausnum er ætlað að skila og snúa m.a. að einfaldara aðgengi fyrir notendur, sem og hvatningu um þátttöku íbúanna. Þetta tilkynnist hér með".