Skólanefnd

Óskar Gísli Sveinsson verkefnastjóri viðhaldsverkefna hjá FAK og Guðríður Friðriksdóttir framkvæmdastjóri mættu á fundinn og fóru yfir viðhaldsáætlun ársins 2012 í skólum Akureyrarbæjar.

Fyrir fundinn voru lagðar tillögur stýrihóps um stjórnkerfi skóla Akureyrarbæjar. Tillögurnar fela meðal annars í sér að heildstæðir grunnskólar með 400-500 nemendum á aldrinum 6-16 ára verði festir í sessi, unnið verði að sameiningu leikskóla þannig að á hverjum þeirra verði 90-150 börn, hvatt verði til aukinnar teymisvinnu kennara í öllum skólum bæjarins og dreifstýring verði aukin í leikskólum til samræmis við það sem er í grunnskólum. Markmið tillagnanna er að efla faglegt starf innan skóla Akureyrarbæjar.
Tillögurnar eru aðgengilegar á heimasíðu skóladeildar http://skoladeild.akureyri.is

Fyrir fundinn voru lögð til kynningar og umræðu, drög að nemendaspá 2013-2018 fyrir leikskóla.

Á síðasta fundi skólanefndar var að ósk Önnu Sjafnar Jónasdóttur L-lista opnuð umræða innan skólanefndar um endurskoðun fjölskyldustefnunnar.
Á fundinum var haldið áfram að ræða málin frá ýmsum hliðum og komu margar hugmyndir fram, sem verða ræddar áfram.

Fyrir fundinn var lögð tillaga að skiptingu kennslustunda til almennrar kennslu og sérkennslu milli skólanna. Fram kom á fundinum að ekki liggur enn endanlega fyrir hvernig sérkennsla dreifist þar sem ekki er komin niðurstaða í hvar nokkrir nemendur sem þurfa mikinn stuðning verða staðsettir.
Fyrir liggur að unnið er í samræmi við samþykkt viðmið um úthlutun.