Skólanefnd

Skólanefnd byrjaði á því í upphafi fundar að skoða framkvæmdir við 2. áfanga Naustaskóla og var svo farið yfir ástæður þess að óskað hefur verið eftir því að miðrými verði einnig lokið fyrir næstkomandi haust. Þá var rætt um hönnunarforsendur fyrir eldhús þ.e. hvort eigi að miða við að eldhúsið geti annað þjónustu við nýjan leikskóla sem mun verða byggður í Naustahverfi eftir nokkur ár.

Anna Sjöfn Jónasdóttir fulltrúi skólanefndar í vinnuhópi um endurskoðun fjölskyldustefnu kynnti nokkur atriði á fundinum sem hópurinn er að skoða og óskaði eftir því að fá viðbrögð frá nefndarmönnum á næsta fundi skólanefndar.

Fyrir fundinn voru lagðar til kynningar upplýsingar um fjölda barna í frístund og skólafæði í grunnskólum mánuðina janúar til mars og til samanburðar fjöldi barna í þessari þjónustu sömu mánuði fyrir ári. Fram kemur að aukning er í fjölda skólamáltíða milli ára en fækkun á sölutímum í frístund.

Fyrir fundinn voru lögð til kynningar drög að nemendaspá 2013-2018 fyrir leikskóla.

Fyrir fundinum lá tillaga um að tilnefna fulltrúa skólanefndar í starfshóp um skipulag íþrótta- og tómstundaskóla (frístundaskóla) fyrir börn á aldrinum 5 - 9 ára á Akureyri.

Erindi dags. 23. febrúar 2012 frá leikskólanum Kiðagili þar sem óskað er eftir því að starfsdagur og námskeiðsdagur vorannar verði færðir til 20. og 23. apríl 2012. Tilefnið er náms- og kynnisferð starfsmanna til Írlands. Fram kemur að foreldraráð gerir ekki athugasemdir vegna málsins.

Lagður fram til kynningar tölvupóstur dags. 28. febrúar 2012 frá Sambandi íslenskra sveitarfélaga, þar sem kynnt er að stjórn sambandsins hafi samþykkt á fundi sínum 24. febrúar sl. nýjar viðmiðunarreglur vegna dvalar barna á leikskólum utan lögheimilissveitarfélags. Um er að ræða reglur sem gilda eiga út árið 2012.

Starfshópur sá sem vann reglurnar mun framhalda vinnu sinnu við frekari greiningar á eftirtöldum þáttum og ljúka henni fyrir árslok 2012:

a) aldurstengdur kostnaður vegna dvalar barna á leikskólum.

b) kostnaður við sérfræðiþjónustu og greiningu á öðrum sértækum kostnaði er tengist dvöl barna á leikskólum.

Sérstök athygli er vakin á þeirri breytingu að nú er gjaldskrá viðmiðunarreglna miðuð við meðaltalsraunkostnað sveitarfélaga við leikskóladvöl barna. Í 5. gr. kemur fram að í viðmiðunargjaldi sé innifalinn allur almennur leikskólakostnaður, þ.m.t. kostnaður vegna húsnæðis og sérfræðiþjónustu.

Það er undirstrikað að um viðmiðunarreglur er að ræða og sveitarfélögum í sjálfsvald sett hvort þau nýti sér hana í samskiptum sín á milli vegna barna sem þiggja leikskólaþjónustu utan lögheimilissveitarfélags.