Bæjarráð

Bæjarráð felur sviðsstjórum stjórnsýslu- og samfélagssviðs að auglýsa atvinnuátaksverkefnin í samvinnu við Vinnumálastofnun.

Bæjarráð felur sviðsstjórum stjórnsýslu- og samfélagssviðs að auglýsa atvinnuátaksverkefni fyrir 18-25 ára.

Bæjarráð Akureyrarbæjar ítrekar fyrri ósk um að 8. gr. í samningi um byggingu nýs hjúkrunarheimilis á Akureyri hljóði sem hér segir: „Sjúkratryggingar Íslands munu auglýsa eftir rekstraraðila fyrir hjúkrunarheimilið tólf mánuðum áður en verklok eru fyrirhuguð.“ Er þetta ákvæði orðað á sama hátt og ákvæði í gr. 3.3. í samningi um byggingu hjúkrunarheimilis í Hafnarfjarðarkaupstað, dagsettum 27. október 2016, sem tekið var í notkun árið 2019. Hér var um að ræða breytingu á áður gerðum samningi um byggingu hjúkrunarheimilis, þar sem orðalagið í fyrri samningi var á sama hátt og ráðuneytið gerir nú kröfu um að verði í nýjum samningi við Akureyrarbæ. Gera verður kröfu til þess að sveitarfélög sitji við sama borð hvað þetta varðar.

Samkvæmt lögum ber ríkið ábyrgð á rekstri hjúkrunarheimila. Hins vegar ber sveitarfélögum að greiða 15% af byggingarkostnaði hjúkrunarheimila á móti ríkinu sem greiðir þá 85%. Af hálfu Akureyrarbæjar verður staðið við þá kostnaðarhlutdeild sveitarfélagsins í byggingu nýs hjúkrunarheimilis.

Varðandi þá kröfu ráðuneytisins að setja sem skilyrði fyrir samningi um byggingu nýs hjúkrunarheimilis á milli Akureyrarbæjar og ríkisins að Akureyrarbær ábyrgist rekstur hjúkrunarheimilisins er ljóst að með því er verið að mismuna sveitarfélögum. Jafnframt gæti ráðuneytið með þessu skilyrði verið að mismuna íbúum á Íslandi, sem eiga rétt á þjónustunni, ef skilyrðið er að viðkomandi sveitarfélag ábyrgist reksturinn sem það síðan fellst ekki á. Ríkinu ber að veita þessa þjónustu án þess að setja skilyrði varðandi reksturinn á þriðja aðila, sveitarfélagið. Fallist viðkomandi sveitarfélag ekki á kröfu ráðuneytisins með þeim afleiðingum að þjónustan falli niður er verið að mismuna íbúum í því sveitarfélagi með vísan til íbúa í öðru sveitarfélagi þar sem byggt væri nýtt hjúkrunarheimili án slíkra skilyrða.

Rétt er að árétta að ástæða þess að Akureyrabær fellst ekki á að ábyrgjast rekstur nýs hjúkrunarheimilis er að sveitarfélagið hefur undanfarin ár rekið hjúkrunarheimili á Akureyri með miklum halla og ítrekað óskað eftir frekari greiðslum frá ríkinu vegna þess sem ríkið hefur ekki fallist á. Fyrir liggur rekstrarúttekt frá KPMG þar sem fram kemur að rekstrarhalli er ekki til kominn vegna þess að Akureyrarbær sé að veita þjónustu umfram kröfulýsingu. Með hliðsjón af því hefur Akureyrarbær nýlega tilkynnt ráðuneytinu að hann muni hvorki endurnýja gildandi samning né gera nýjan samning um rekstur hjúkrunarheimilisins. Það er mat bæjarráðs Akureyrarbæjar með hliðsjón af framanrituðu að betur fari á því að ríkið annist rekstur hjúkrunarheimila eins og því ber samkvæmt lögum og sveitarfélagið nýti það fjármagn sem ella færi í að greiða niður hallarekstur hjúkrunarheimila í að efla lögbundna þjónustu sveitarfélagsins.

Bæjarráð samþykkir framlögð drög að vinnuferli við gerð fjárhagsáætlunar.

Bæjarráð samþykkir viðauka 5 að fjárhæð 47,3 milljónir króna og vísar honum til staðfestingar í bæjarstjórn.

Bæjarráð beinir því til fastanefnda að taka skjalastefnuna og tilheyrandi verklagsreglur til umfjöllunar. Jafnframt verði kynnt staða skjalamála á starfssviði hverrar nefndar. Bæjarráð ítrekar að meðferð skjala er mikilvægur hluti faglegrar og upplýsandi stjórnsýslu og hvetur fastanefndir, sviðsstjóra og forstöðumenn til að tryggja að unnið sé í samræmi við skjalastefnuna.

Bæjarráð felur Dan Jens Brynjarssyni sviðsstjóra fjársýslusviðs að fara með umboð Akureyrarbæjar á aðalfundinum.

Bæjarráð Akureyrarbæjar fagnar frumvarpinu og vekur athygli á því að Akureyrarbær hefur þegar hafið umfangsmiklar fráveituframkvæmdir. Bæjarráð hvetur til þess að tryggt verði að styrkir vegna fráveituframkvæmda nái einnig til þeirra sveitarfélaga sem þegar hafa hafið kostnaðarsamar framkvæmdir á undanförnum árum en ekki eingöngu til þeirra sveitarfélaga sem dregið hafa að fara í slíkar framkvæmdir.