Skólanefnd

Sesselja Sigurðardóttir leikskólaráðgjafi mætti á fundinn og gerði grein fyrir áætlaðri stöðu mála í innritun barna í leikskólana á þessu ári. Þar kom fram að 249 börn útskrifast úr leikskóla í vor og haust. Árgangur 2009 telur 272 börn og eru nú þegar 44 börn innrituð. Ef ekki verða frekari breytingar ættu um 20 börn úr árgangi 2010 að komast inn í leikskóla í haust. Helst vantar leikskólarými í Naustahverfi. Fram kom tillaga um að fjölga rýmum um 10-12 í Lundarseli og fækka rýmum í Sunnubóli á móti. Þá var lagt til að í leikskólunum Flúðum og Pálmholti verði tímabundið hópar fyrir börn úr Naustahverfi.

Sesselja Sigurðardóttir leikskólaráðgjafi gerði grein fyrir stöðu mála hjá dagforeldrum og hugsanlegri þróun á þessu ári.
Fram kom að nú starfa 37 dagforeldrar á Akureyri og eru vistuð hjá þeim 171 barn. Ekki liggur fyrir hve mörg börn eru á biðlista. Nú liggur fyrir að fækkun verður í hópi dagforeldra á þessu ári.

Fyrir fundinn var lagt minnisblað um verklag ef fella þarf niður kennslu í grunnskólum og biðja foreldra leikskólabarna um að halda þeim heima vegna óveðurs og/eða ófærðar.

Fyrir fundinn var lögð fram til kynningar dagskrá Dags leikskólans sem verður haldinn hátíðlegur 6. febrúar nk.

Lögð fram til kynningar ályktun frá Félagi leikskólakennara, Félagi stjórnenda leikskóla og sameiginlegri skólamálanefnd beggja félaganna dags. 9. desember 2010. Þar er reifað mikilvægi starfa leikskólafulltrúa og leikskólaráðgjafa hjá sveitarfélögum og varað við því að skera niður þessar mikilvægu stöður, eins og gert hefur verið í einstaka sveitarfélögum, þar sem það muni hafa í för með sér alvarlegar afleiðingar fyrir leikskólastarf.

Skólanefnd var gerð grein fyrir stöðu málsins.