Starfs- og fjárhagsáætlun frístundaráðs 2021

Í samningum við íþróttahreyfinguna segir m.a. að fjárhæðir séu með fyrirvara um framlög úr bæjarsjóði í fjárhagsáætlun hvers árs. Í ljósi erfiðrar stöðu bæjarsjóðs samþykkir frístundaráð að þjónustusamningar við íþróttahreyfinguna verði frystir í eitt ár og þeir þættir í rekstrarsamningum, aðrir en launaliðir, taki ekki hækkunum á árinu 2021.

Frístundaráð samþykkir starfsáætlun 2021.

Starfsáætlunin er unnin í anda samstarfssáttmála bæjarstjórnar þar sem lögð er áhersla á að vernda viðkvæma hópa og málefni barna og ungmenna sett í forgang. Af einstökum verkefnum má nefna að starfsemi Punktsins verður að mestu lögð niður í Rósenborg og hluta komið fyrir í öðru húsnæði bæjarins. Komið verður á mælaborði sem sýnir stöðu ungs fólks í sveitarfélaginu og ný aðgerðaáætlun barnvæns sveitarfélags mun verða til. Starfsemi Ungmennahússins verður tekin til endurskoðunar og áhersla verður á að efla þjónustu sem fellur undir Virkið og aukið við rafræna þjónustu. Þjónusta við félagsstarf eldri borgara í Víðilundi og Bugðusíðu verður samþætt og lögð áhersla á að auka við heilsueflandi tilboð í starfseminni.

Á árinu 2021 vinnur frístundaráð Akureyrarbæjar að því að áherslur í félagsstarfi eldri borgara taki meira mið af heilsueflandi aðgerðum. Þetta verði gert í samstarfi við Háskólann á Akureyri og íþróttahreyfinguna. Öldungaráð fagnar þessu markmiði frístundaráðs.

Mikilvægt er að EBAK - Félag eldri borgara og öldungaráð taki virkan þátt í markmiðssetningu og skipulagningu þessa mikilvæga verkefnis.

Öldungráð tilnefnir Halldór Gunnarsson sem tengilið vegna verkefnisins og Valgerði Jónsdóttur til vara.


Punkturinn:

Ráðið ítrekar svohljóðandi bókun sína frá 9. mars 2020.

„Fjöldi eldri borgara og annarra hópa hefur notið góðrar aðstöðu og þjónustu á Punktinum á undanförnum árum.

Eldri borgurum fjölgar hratt og því mun frekar þurfa að bæta við rými til félagsstarfs, en að þrengja að því. Öldungaráð telur mikilvægt að taka tillit til þessara atriða þegar fjallað er um framtíð Punktsins.“


Ráðið bendir einnig á, að ef hluti starfs Punktsins verður flutt í Víðilund þarf að gera ráð fyrir kostnaði við breytingar á húsnæði og viðbótar bílastæðum.