Fjárhagsáætlun fræðslusviðs 2019-2022

Fræðsluráð samþykkir samhljóða framlagða starfsáætlun fyrir árið 2019.

Rósa Njálsdóttir M-lista, Marsilía Dröfn Sigurðardóttir D-lista og Þuríður Sólveig Árnadóttir áheyrnarfulltrúi V-lista leggja fram svohljóðandi tillögu:

Lagt er til að opnunartími leikskóla Akureyrarbæjar verði frá kl. 7:40 - 16:30 frá 1. janúar 2019.

Fulltrúar M-lista og D-lista greiddu tillögunni atkvæði. Meirihluti fræðsluráðs greiddi atkvæði gegn tillögunni á þeim forsendum að áætlaður kostnaður tillögunnar liggur ekki fyrir né heldur greining á þörf foreldra fyrir auknum opnunartíma.

Rósa Njálsdóttir M-lista, Marsilía Dröfn Sigurðardóttir D-lista og Þuríður Sólveig Árnadóttir áheyrnarfulltrúi V-lista leggja fram svohljóðandi tillögu:

Lagt er til að sumarlokun leikskóla Akureyrarbæjar verði 2 vikur sumarið 2019 og skoðað í framhaldi af því hvort framhald verði á ef vel tekst til.

Tillagan er felld með þremur atkvæðum fulltrúa meirihlutans gegn tveimur atkvæðum fulltrúa M-lista og D-lista.

Rósa Njálsdóttir M-lista, Marsilía Dröfn Sigurðardóttir D-lista og Þuríður Sólveig Árnadóttir áheyrnarfulltrúi V-lista gera svohljóðandi bókun:

Í ljósi þess að tillögum varðandi rýmri opnunartíma leikskólanna var hafnað vill minnihlutinn árétta að með þessu móti hefði verið hægt að koma til móts við fjölskyldur ungra barna sem vegna atvinnu sinnar hafa oftar en ekki knappan tíma til að koma börnum í og úr vistun leikskólanna. Sumarlokun í tvær vikur hefði þau jákvæðu áhrif að foreldrar gætu á þann hátt skipulagt sumarfrí sín yfir lengra tímabil en verið hefur.

Meirihluti fræðsluráðs gerir svohljóðandi bókun:

Kannanir hafa sýnt að mikill meirihluti foreldra er ánægður með núverandi fyrirkomulag auk þess sem lenging á opnunartíma leiðir til óhagræðis í mönnun og rekstri leikskóla. Jafnframt liggur ekki fyrir kostnaðarmat á tillögunni.

Meirihluti fræðsluráðs samþykkir framlagða tillögu að fjárhagsáætlun 2019. Fulltrúar M-lista og D-lista sátu hjá við afgreiðslu málsins. Tillögunni er vísað til bæjarráðs.

Erindinu vísað til umhverfis- og mannvirkjasviðs Akureyrarbæjar til frekari vinnslu við fjárhagsáætlanagerð 2020-2022.