Bæjarstjórn

Lögð fram tillaga S-lista um breytingu á skipan varafulltrúa í skipulagsráði:

Dagbjört Pálsdóttir tekur sæti varafulltrúa í skipulagsráði í stað Tryggva Gunnarssonar.

Lögð fram tillaga B-lista um breytingu á skipan varafulltrúa í frístundaráði:

Ingibjörg Ólöf Isaksen kemur í stað Sigríðar Valdísar Bergvinsdóttur.

14. liður í fundargerð skipulagsráðs dagsett 14. mars 2018:

Erindi dagsett 21. júlí 2015 frá Guðmundi Helga Gunnarssyni f.h. Rósu Maríu Stefánsdóttur þar sem lögð er fram tillaga að deiliskipulagi fyrir Hesjuvelli, landnr. 212076. Tillaga að deiliskipulagi Hesjuvalla var auglýst frá 10. janúar til 21. febrúar 2018. Auglýsingar birtust í Lögbirtingablaði og Dagskránni. Skipulagsgögn voru aðgengileg í þjónustuanddyri Ráðhúss Akureyrar og á heimasíðu bæjarins.

Á deildarfundi umhverfis- og mannvikjasviðs og skipulagssviðs þann 6. febrúar 2018 kom fram að tryggja þarf framtíðarsvæði fyrir vegstæði Lögmannshlíðarvegar, talið 15 m út frá miðlínu vegar, sem geti þjónað framtíðaruppbyggingu vegarins og reiðleiðar.

Tvær umsagnir bárust:

1) Minjastofnun Íslands, dagsett 21. febrúar 2018.

Engar skráðar minjar eru á skipulagssvæðinu og gerir Minjastofnun Íslands ekki athugasemd við deiliskipulagstillöguna. Vakin er athygli á 2. mgr. 24. gr. laga um menningarminjar nr. 80/2012. Ef fornminjar sem áður voru ókunnar finnast við framkvæmd verks skal sá sem fyrir því stendur stöðva framkvæmd án tafar.

2) Landsnet, 19. febrúar 2018.

Af öryggisástæðum skal skilgreina lágmarksfjarlægðir háspennulína til annarra mannvirkja. Helgunarsvæði eru ekki af staðlaðri stærð, heldur ákvörðuð í hverju tilviki. Lágmarks viðmið helgunarsvæða fyrir 66kV loftlínu er 25 m og fyrir 132 kV loftlínu er 35-45 m. Innan helgunarsvæðis gildir byggingabann og þar er ekki hægt að viðhafa skógrækt. Ef upp koma áform um að reisa mannvirki og/eða breyta landnotkun nærri helgunarsvæði er mikilvægt að haft verði samband við Landsnet til að yfirfara lágmarksfjarlægðir. Tryggja þarf að helgunarsvæði séu virt og að tryggja aðgang vegna eftirlits.

Skipulagsráð frestaði afgreiðslu á fundi 28. febrúar 2018.

Umsækjandi lagði fram breytta tillögu þar sem brugðist hefur verið við athugasemd um veghelgunarsvæði og helgunarsvæði raflína.

Skipulagsráð samþykkir að veghelgunarsvæði og helgunarsvæði raflína verði sett inn á deiliskipulagsuppdrátt samanber umsögn Landsnets.

Skipulagsráð leggur til við bæjarstjórn að deiliskipulagstillagan þannig breytt verði samþykkt og sviðsstjóra skipulagssviðs falið að annast gildistöku hennar samkvæmt 42. grein skipulagslaga nr. 123/2010 með síðari breytingum.

5. liður í fundargerð bæjarráðs dagsett 15. mars 2018:

4. liður í fundargerð velferðarráðs dagsett 7. mars 2018:

Lagðar fyrir að nýju reglur um sérstakan húsnæðisstuðning, málið var áður á dagskrá velferðarráðs þann 21. febrúar sl.

Magnús Valur Axelsson húsnæðisfulltrúi lagði fram minnisblað sitt dagsett 5. mars 2018.

Anna Marit Níelsdóttir forstöðumaður í félagsþjónustu sat fundinn undir þessum lið.

Velferðarráð samþykkir breytingar á reglum um sérstakan húsnæðisstuðning og þann kostnaðarauka sem í þeim felst fyrir sitt leyti og vísar málinu áfram til bæjarráðs og bæjarstjórnar.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Bæjarráð samþykkir reglurnar fyrir sitt leyti með gildistíma frá og með 1. mars 2018 og vísar þeim til samþykktar í bæjarstjórn.

6. liður í fundargerð bæjarráðs dagsett 15. mars 2018:

Lögð fram drög að endurskoðaðri skjalastefnu Akureyrarbæjar.

Bæjarráð samþykkir framlagða endurskoðun á skjalastefnu og vísar henni til samþykktar í bæjarstjórn.

Umræða um heimilislaust fólk á Akureyri.

Starfsáætlun og stefnuumræða skipulagsráðs.

Tryggvi Már Ingvarsson formaður skipulagsráðs gerði grein fyrir starfsáætlun ráðsins.

Eiríkur Björn Björgvinsson bæjarstjóri fór yfir helstu atriði í störfum sínum frá síðasta fundi bæjarstjórnar.