Skipulagsráð

Ásthildur Sturludóttir bæjarstjóri, Inga Þöll Þórgnýsdóttir bæjarlögmaður og Hulda Sif Hermannsdóttir aðstoðarmaður bæjarstjóra kynntu endurskoðaða samþykkt fyrir skipulagsráð sem tók gildi 1. janúar 2022 ásamt nýju skipuriti Akureyrarbæjar og greinargerð vegna stjórnsýslubreytinga.

Lagður fram til kynningar úrskurður úrskurðarnefndar umhverfis- og auðlindamála dagsettur 28. desember 2021 varðandi breytingu á deiliskipulagi miðbæjar Akureyrar. Niðurstaða nefndarinnar er að hafna kröfu um ógildingu ákvörðunar bæjarstjórnar Akureyrarbæjar frá 18. maí 2021 um að samþykkja breytingu á deiliskipulaginu.

Kynningu skipulagstillögu á vinnslustigi skv. 2. mgr. 30. gr. skipulagslaga nr. 123/2010 er lokið og bárust engar athugasemdir við tillöguna. Umsögn barst frá Minjastofnun Íslands.

Lögð fram til kynningar drög að deiliskipulagi Móahverfis.

Lögð fram endurskoðuð tillaga að breytingu á deiliskipulagi sem nær til lóðar nr. 55 við Kjarnagötu (hús 55 og 57). Í breytingunni felst eftirfarandi:

1. Hús nr. 55 lækkar úr 7 hæðum í 6 með hámarkshæð 18,5 m auk þess sem byggingarreitur stækkar.

2. Byggingarreitur húss nr. 57 hliðrast um 1 m til vesturs auk þess sem hann breikkar um 1 m sem felur í sér að byggingarreitur einnar hæðar byggingar hliðrast um 2 m til vesturs. Þá bætist við 4. hæð sem er inndregin á þrjá vegu. Gólfkóti byggingar hækkar í 88,5.

3. Tvö langstæði meðfram Kjarnagötu breytast í bílastæði fyrir hreyfihamlaða til samræmis við kröfur byggingarreglugerðar nr. 112/2012.

4. Bílastæði við Geirþrúðarhaga lengjast um 1 m til vesturs og lóðin stækkar um 5 m².

5. Lágmarks lofthæð lækkar um 0,2 m og verður að lágmarki 2,3 m.

Kynningu skipulagslýsingar í samræmi við 3. mgr. 40. gr. skipulagslaga nr. 123/2010 er lokið og bárust engar athugasemdir við lýsinguna. Umsagnir bárust frá Minjastofnun Íslands, Norðurorku, Landsneti, RARIK og eru þær lagðar fram til kynningar. Beðið er umsagnar Skipulagsstofnunar.

Erindi Haraldar S. Árnasonar dagsett 6. janúar 2022 fyrir hönd lóðarhafa Dvergaholts 5-9 þar sem óskað er eftir afstöðu skipulagsráðs til eftirfarandi atriða:

1) Hús verði hækkuð frá uppgefnum hæðarkótum gildandi deiliskipulags.

2) Minniháttar tilfærslur út fyrir byggingarreit.

3) Hús megi vera allt að fjórar hæðir allsstaðar innan byggingarreits.

4) Innkeyrsla inn á lóð færist til vesturs.

Erindi dagsett 4. janúar 2022 þar sem Arnþór Tryggvason fyrir hönd Kælismiðjunnar Frosts ehf. sækir um breytt deiliskipulag á lóðum við Austursíðu, Draupnisgötu 5 og Fjölnisgötu 4A. Breytingin snýr að færslu lóðamarka. Meðfylgjandi er skýringarmynd.

Erindi dagsett 14. nóvember 2021 þar sem Ketill Ketilsson fyrir hönd Fasteignafélagsins Langeyrar ehf. leggur inn fyrirspurn varðandi breytt deiliskipulag fyrir hús nr. 29 við Hafnarstræti. Fyrirhugað er að fjölga íbúðum úr þremur í sex. Umrætt hús er byggt árið 1907. Fyrir liggja drög að áliti frá Minjastofnun Íslands.

Erindi dagsett 16. desember 2021 þar sem Vilhelm Patrick Bernhöft fyrir hönd Glerárgötu 28 ehf. sækir um leyfi fyrir mathöll í húsi nr. 28 við Glerárgötu. Ekki er í gildi deiliskipulag á svæðinu.

Erindi dagsett 20. desember 2021 þar sem Sigríður Hrefna Pálsdóttir fyrir hönd Hörgársveitar óskar eftir umsögn Akureyrarbæjar um skipulagslýsingu fyrir breytingu á Aðalskipulagi Hörgársveitar 2012-2024 og deiliskipulag íbúðahverfis í Glæsibæ, Hörgársveit. Meðfylgjandi er skipulagslýsing.

Erindi dagsett 5. janúar 2022 þar sem Ágúst Guðnason sækir um framkvæmdafrest á lóð nr. 1 við Nonnahaga þar til í apríl / maí næstkomandi.

Erindi dagsett 5. janúar 2022 þar sem Þríforkur ehf. sækir um lóð nr. 2 við Týsnes. Meðfylgjandi er yfirlýsing viðskiptabanka.

Erindi dagsett 6. janúar 2022 þar sem Nesbræður ehf. sækja um lóðir nr. 2 og 4 við Týsnes og óska jafnframt eftir breytingu á deiliskipulagi. Í breytingunni felst að lóðir nr. 2 og 4 eru sameinaðar í eina auk þess sem hluti lóðar nr. 6 er felldur inn í nýja lóð. Meðfylgjandi er afstöðumynd sem sýnir hugmynd að útfærslu nýrrar lóðar.

Lögð fram til kynningar fundargerð 845. fundar, dagsett 22. desember 2021, með fullnaðarafgreiðslum erinda. Fundargerðin er í 3 liðum og er hana að finna á heimasíðu Akureyrarbæjar.