Breyting á verðskrá Norðurorku

Meirihluti bæjarráðs samþykkir hækkun á gjaldskrá vatnsveitu og staðfestir framlagðar gjaldskrár með gildistíma frá 1. ágúst nk. Sviðsstjóra fjársýslusviðs er falið að útfæra fyrirkomulag álagningar með hliðsjón af því að gjaldskrá Norðurorku sé endurskoðuð ársfjórðungslega.

Sunna Hlín Jóhannesdóttir B-lista situr hjá við afgreiðslu málsins og óskar bókað:

Í byrjun árs fá fasteignaeigendur á Akureyri álagningarseðil fyrir fasteignagjöld ársins sem greiðast á átta gjalddögum yfir árið og geta þá skipulagt fjármál sín út frá ákveðnum forsendum. Nú eru tveir gjalddagar eftir og stjórn Norðurorku hefur ákveðið að hækka gjaldskrá fráveitu og vatnsgjald um 4.9% frá 1. ágúst í stað þess að hækka gjaldskrá um áramótin eins og hefur tíðkast. Við þetta skapast óþarfa vinna á starfsfólk Akureyrarbæjar og okkar þjónustuaðila sem hefur nú þegar sent út álagningarseðil fyrir árið og það dregur úr fyrirsjáanleika fyrir fasteignaeigendur. Fyrir þessu hefði átt að hugsa og eiga samtal við Akureyrarbæ um fyrirkomulagið áður en stjórn Norðurorku samþykkti í október 2022 að nú eigi að endurskoða gjaldskrá Norðurorku ársfjórðungslega.