Raforkumál og raforkuflutningur

Lögð fram eftirfarandi tillaga að bókun:

Bæjarstjórn Akureyrar lýsir yfir áhyggjum af stöðu raforkumála. Ástand orkumála í Eyjafirði er og hefur verið mjög viðkvæmt og hamlandi til atvinnuuppbyggingar sem þarfnast raforku eins og t.d. létts iðnaðar. Þá lenda fyrirtæki í firðinum reglulega í vandræðum vegna ótryggra raforkuflutninga inn á svæðið ásamt spennuflökti sem hefur valdið mörgum fyrirtækjum vandræðum og jafnvel tjóni. Bæjarstjórn Akureyrar gerir athugasemdir við seinagang stjórnvalda og opinberra aðila í þessum málum og skorar á tilvonandi þingmenn að beita sér í málinu en afar mikilvægt er að jafna aðstöðu landsmanna til atvinnuuppbyggingar og búsetu.

Verði ekki hægt að tryggja raforku inn á svæðið frá vatns- og gufuaflsvirkjunum á næstu þremur árum þá sér bæjarstjórn ekki annan möguleika en að reistar verði díeselrafstöðvar sem geti annað fyrirsjáanlegri þörf á Eyjafjarðarsvæðinu á komandi árum, þar til umhverfisvænni lausnir verða að veruleika.



Bæjarstjórn samþykkir framlagða bókun með 11 samhljóða atkvæðum.