Fréttir

Í nóvember fáum við til okkar þrjár magnaðar konur sem ætla að miðla af þekkingu sinni og skáldskap. Steinunn Sigurðardóttir kemur 19. nóvember og les úr bók sinni "Fyrir Lísu" - Úlfhildur Dagsdóttir kemur 21. nóvember og fjallar um vampýrur og ólíkar birtingarmyndir þeirra í bókmenntum og kvikmyndum - Margrét Blöndal kemur síðan 26. nóvember og les úr bók sinni um Elly Vilhjálms. Allir viðburðirnir hefjast kl. 17:00 og eru öllum opnir. Amtskaffi Ilmur verður með heitt á könnunni.

Það var einstaklega gaman að opna safnið í dag - Yfir 100 gestir streymdu inn - Stór hópur úr Naustaskóla og annar minni hópur frá Iðavöllum - Takk fyrir komuna öll sömul og velkomin aftur :-)

Barnabókasetur, rannsóknarsetur um barnabókmenntir og lestur barna, stendur fyrir málþinginu YNDISLESTUR - aðlaðandi aðferðir til að auka áhuga barna á yndislestri. Málþingið verður föstudaginn 16. nóvember í Háskólanum á Akureyri á Degi íslenskrar tungu og afmælisdegi hins ástsæla barnabókahöfundar Jóns Sveinssonar, Nonna. Laugardaginn 17. nóvember bjóða Barnabókasetur ásamt menningarhúsinu Hofi til lestrarhátíðar í Hofi kl. 13:00-16:00. Rithöfundar lesa úr nýútkomnum bókum og rifja upp bernskulestur sinn. Einnig verður Eymundsson á Akureyri með kynningu á nýjum og vinsælum barnabækum.

Bækur og annað safnefni þolir illa kulda, raka og bleytu. Það er því ekki æskilegt að geyma bækur eða geisladiska í bílnum á köldum vetrardögum. Við mælum líka eindreigið með því að nota poka undir bækurnar ef það er úrkoma og éljagangur. Það eru fleiri sem fá lánað á eftir þér:-)

Amtsbókasafnið og Menningarhúsið Hof vinna saman að dagskrá þar sem fjallað er um ritlist og bókmenntir á einn eða annan hátt. Bókahillu hefur verið komið fyrir á veitingastaðnum í Hofi, 1862 Nordic Bistro, og geta gestir og gangandi gluggað í bækurnar í hillunni. - Í nóvember er þemað; 100 bestu barnabækurnar, en á bókasafnsdeginum árið 2012 tók Amtsbókasafnið saman lista yfir hundrað barna- og unglingabækur sem hafa verið í uppáhaldi hjá starfsfólki bókasafna víðsvegar um landið.

Það má finna bæði gull og gersemar í formi gamalla bóka, blaða, kvikmynda og hljómdiska á markaðnum hjá okkur í nóvember. Við bætum reglulega á borðið - Sjón er sögu ríkari!

...að senda afmælisdömunni Akureyri afmæliskort! Við hvetjum alla til þess að óska Akureyri til hamingju með afmælið og fá um leið tækifæri til þess að vera með í sýningu á afmæliskortum sem bænum hafa borist undanfarna mánuði

Við erum byrjuð að prjóna einstakan Amtsbókaorm og viljum gjarnan fá aðstoð frá ykkur, kæru viðskiptavinir – Karfa með prjónum og hnyklum er hjá sófanum í handverksbókunum og við hvetjum alla til að prjóna nokkrar lykkjur – Við gerum okkur vonir um að Amtsbókaormurinn okkar verði bæði langur og litfagur þannig að ef þið eigið garnafganga er ykkur velkomið að leggja ykkar hnykla í körfuna líka :-)