Þriðjudaginn 5. mars hefst starfslokanámskeið á vegum Akureyrarbæjar. Markmið námskeiðsins er að hjálpa starfsfólki að undirbúa starfslok vegna aldurs, aðlaga sig breyttu lífsmynstri og stuðla að innihaldsríku lífi að starfi loknu. Markhópurinn er starfsfólk eldra en 60 ára og er námskeiðið þátttakendum að kostnaðarlausu. Samstarfsaðilar að námskeiðinu eru Akureyrarbær, Sjúkrahúsið á Akureyri, Norðurorka, Kjölur og Eining Iðja.

Viðbrögð starfsmanna við tilboði á árskortum í Sundlaugar Akureyrar hafa verið góð í febrúar og því sönn ánægja að koma því á framfæri að til og með 31. desember 2013 stendur starfsmönnum Akureyrarbæjar til boða að kaupa árskort í Sundlaugar Akureyrar á 50% afslætti. Fullt verð á árskorti skv. gjaldskrá 2013 er kr. 32.500.

Föstudaginn 22. febrúar var send út spurningakönnun til allra starfsmanna Akureyrarbæjar sem eru í meira en 30% starfshlutfalli. Könnunin verður send á netföng starfsmanna en þeir sem hafa ekki netföng munu fá upplýsingar um það á vinnustað sínum hvernig þeir geta svarað könnuninni. Í könnuninni er spurt um líðan, heilsu og starfstengd viðhorf starfsfólks sveitarfélagsins. Starfsfólk er eindregið hvatt til þess að svara spurningalistanum og leggja þannig rannsókninni lið og stuðla að bættu starfsumhverfi fyrir starfsfólk Akureyrarbæjar.

Starfsmönnum Akureyrarbæjar býðst hópafsláttur af miðum á tónleika Sigríðar Beinteinsdóttur 2. mars í Hofi. Ef pantaðir eru 10-20 miðar - 10% afsláttur af miðaverði (miðinn þá á kr. 5.850). Ef pantaðir eru 21-30 miðar - 15% afsláttur af miðaverði (miðinn þá á kr. 5.525). Ef pantaðir eru 31-40+ miðar - 20% afsláttur af miðaverði (miðinn þá á kr. 5.200).