Starfsmannakönnun send út í dag

Föstudaginn 22. febrúar var send út spurningakönnun til allra starfsmanna Akureyrarbæjar sem eru í meira en 30% starfshlutfalli. Könnunin verður send á netföng starfsmanna en þeir sem hafa ekki netföng munu fá upplýsingar um það á vinnustað sínum hvernig þeir geta svarað könnuninni.

Í könnuninni er spurt um líðan, heilsu og starfstengd viðhorf starfsfólks sveitarfélagsins. Sams konar könnun var gerð árið 2010 og árið 2011 og eru kannanirnar hluti af doktorsverkefni Hjördísar Sigursteinsdóttur í félagsfræði við Háskóla Íslands. Með könnuninni er einnig verið að uppfylla markmið í mannauðstefnu og jafnréttisstefnu Akureyrarbæjar.

Starfsfólk er vinsamlega beðið um að svara spurningalistanum eins ítarlega og það treystir sér til. Það tekur u.þ.b. 10-15 mínútur.

Könnunin veitir mikilvægar upplýsingar sem gagnast til að stuðla að bættu starfsumhverfi. Í kjölfar fyrri kannana var skipaður sérstakur starfshópur sem fékk það verkefni að fylgja niðurstöðum eftir og gera tillögur um aðgerðir. Starfshópurinn hefur t.a.m. komið á námskeiðum um starfsmannasamtöl fyrir stjórnendur og stuðlað að því að boðið verði upp á fræðslu um vellíðan á vinnustað og viðbrögð við einelti á vinnustöðum bæjarins.

Í síðustu könnun var svarhlutfall nokkuð gott eða um 68%. Niðurstöður gáfu þar af leiðandi góða vísbendingum um líðan starfsfólks Akureyrarbæjar. Þegar á heildina er litið voru niðurstöður könnunarinnar ánægjulegar og virðist starfsfólk Akureyrarbæjar almennt ánægt í starfi. Niðurstöður gáfu til kynna að 85,8% starfsmanna sé mjög eða frekar sammála fullyrðingunni „Þegar á heildina er litið er ég ánægð(ur) í starfi mínu“. Skoða má niðurstöður fyrri kannana í starfsmannahandbókinni á vefnum.

Starfsfólk er eindregið hvatt til þess að svara spurningalistanum og leggja þannig rannsókninni lið og stuðla að bættu starfsumhverfi fyrir starfsfólk Akureyrarbæjar.