Á 150 ára afmæli Akureyrarkaupstaðar í fyrra var ákveðið að heiðra sérstaklega starfsfólk sem þá hafði unnið hjá bænum í 40 ár eða meira. Ætlunin er að gera þetta að árlegum viðburði og á afmæli bæjarins í síðustu viku, 29. ágúst, var sex einstaklingum boðið til kaffisamsætis með bæjarstjórn og yfirmönnum sínum í bæjarstjórnarsalnum í Ráðhúsinu. Þessum traustu starfsmönnum var færð bókargjöf og blómvöndur.

Fjórða árið í röð tekur SÍMEY þátt í sí- og endurmenntun skólaliða, stuðningsfulltrúa, ritara og fleiri starfsstétta í grunnskólum Akureyrar með námskeiðinu „Að verða hluti af heild“. Mikil ánægja hefur verið með þetta námskeið og má segja að það sé orðið hluti af starfsdögum grunnskólanna. Tilgangurinn með námskeiðinu er að efla og hvetja starfsmenn í kröfuhörðum störfum fyrir komandi vetur. Það er von og trú allra sem að þessu verkefni koma að vel hafi tekist til og skili þátttakendum uppbyggilegri fræðslu sem nýtist í starfi.