Að verða hluti af heild - haldið í fjórða sinn

Starfsfólk grunnskóla Akureyrarbæjar á námskeiði í SÍMEY

Fjórða árið í röð tekur SÍMEY þátt í sí- og endurmenntun skólaliða, stuðningsfulltrúa, ritara og fleiri starfsstétta í grunnskólum Akureyrar með námskeiðinu „Að verða hluti af heild“. Mikil ánægja hefur verið með þetta námskeið og má segja að það sé orðið hluti af starfsdögum grunnskólanna.

Tilgangurinn með námskeiðinu er að efla og hvetja starfsmenn í kröfuhörðum störfum fyrir komandi vetur. Það er von og trú allra sem að þessu verkefni koma að vel hafi tekist til og skili þátttakendum uppbyggilegri fræðslu sem nýtist í starfi.

Námskeiðið var haldið dagana 19. og 20. ágúst og í þetta sinn tóku starfsmenn þátt í 8 klukkustunda námskeiði þar sem fjallað meðal annars er um ADHD, einhverfu og asperger, og fjölskylduráðgjöf.  Leiðbeinendur hafa allir mikla og víðtæka þekkingu á sínu sviði og komu frá ADHD samtökunum og frá skóladeild Akureyrarbæjar. Öllum þátttakendur bauðst að sækja viðtal hjá náms- og starfsráðgjafa til að skoða frekari möguleika til sí- og endurmenntunar að námskeiði loknu. Stór hópur þátttakenda nýtti sér það.

Við hjá SÍMEY og Akureyrarbæ þökkum þátttakendum og leiðbeindum kærlega samstarfið á námskeiðinu og óskum starfsfólki velfarnaðar í sínum störfum á komandi vetri. 

Námskeiðið styrkja Sveitamennt og Mannauðssjóður Kjalar.