Fréttir

Elfbooks – Elfenbücher – Elfebøger – Livres des elfes - Opnun föstudaginn 28. júní kl. 12:00 - Allir hjartanlega velkomnir! Amtsbókasafninu er heiður af því að verða fyrst til að setja upp sýningu á myndverkum Guðlaugs Arasonar. Sýningin samanstendur af litlum bókaskápum fullum af örsmáum, þekktum, íslenskum sem erlendum, bókum. Hver bókaskápur er heimur útaf fyrir sig og þar búa bæði skáld og ýmsar kynjaverur. Bækurnar kallar Guðlaugur álfabækur og segja má að hér sé um nýja tegund myndlistar að ræða. Sýningin stendur yfir 28. júní til 31. ágúst - Opið alla virka daga kl. 10:00-19:00

Sumarlesturinn hefur gengið eins og í sögu og fjöldi ánægðra barna hefur lokið gefandi námskeiði hjá okkur. Börnin fara um allan bæ og fræðast um sögu bæjarins, húsin og fólkið. Þau hafa heimsótt skáldahúsin, samkomuhúsið, listagilið og fleiri skemmtilega staði. Við erum einstaklega ánægð með þessi börn sem koma til okkar á námskeið – Þau lesa, læra og leika sér og eru til fyrirmyndar í alla staði. Leiðbeinendur eru Herdís Anna Friðfinnsdóttir og Ragna Gestsdóttir – ásamt unglingum í sumarstarfi, þeim Halldóri H. Stefánssyni, Margréti S. Benediktsdóttur og Hafdísi B. Þórðardóttur.

Það var gestkvæmt hjá okkur í morgun - Sjöundubekkingar í ratleik, krakkar frá Tröllaborgum og Kiðagili og ferðafólk af skemmtiferðaskipum - að ógleymdum fastagestum og ýmsum fundahöldum - líf og fjör í yndislegu veðri!

Í sumar er þemað; Ísland – aldrei eins. Land elds og ísa, land fjalla og engja, land birtu og myrkurs. Landið sem getur verið mjúkt eins og mosi eða hrjúft eins og úfið hraun. Andstæður, fjölbreytileiki og litadýrð einkenna ljósmyndabækur um Ísland og myndefnin eru óþrjótandi. Skoðið og njótið!

Hvað er skoppaðu á bókasafnið? Lestrarátak fyrir öll börn 6-12 ára. Er í gangi á bókasafninu frá 10. júní—24. ágúst. Hvað þarf að gera til að vera með: Skoppa á bókasafnið, velja sér bók og fá afhentan þátttökumiða. Lesa bókina og fylla svo út þátttökumiðann. Skoppa aftur á bókasafnið og skila miðanum í þar til gerðan kassa. Velja sér aðra bók og fá annan þátttökumiða.

Nú er komin járnbók á ljósastaur hér fyrir utan Amtsbókasafnið. Bókin er hluti af nýjasta verkefni Barnabókaseturs, sem er röð járnbóka á ljósastaurum milli Nonnahúss og Amtsbókasafnsins. Hver járnbók er í raun opna úr íslenskri barnabók og tilvalið að staldra við og lesa góðan texta sér til skemmtunar.

Vinsamlegast athugið að Amtsbókasafnið verður lokað milli klukkan 10:00 og 12:00 þriðjudaginn 28. maí vegna námskeiðs hjá starfsfólki. Við opnum kl. 12:00 sprenglærð :-) Við bendum á að hægt er að skila í sjálfsafgreiðsluvélunum milli klukkan 10:00 og 12:00.