Fréttir

Hefur þú einhvern tíma verið heima hjá þér og viljað fletta upp í mynddiskasafninu hjá okkur? Ekki endilega bara að finna út hvort ákveðin mynd sé til, heldur líka að fletta í gegnum ákveðnar tegundir kvikmynda? Nú er komin einföld lausn á þessu fyrir þig. Búinn hefur verið til listi á biblíu kvikmyndaáhugamannsins, IMDb (Internet Movie Database), sem inniheldur nær alla mynddiska sem safnið býður upp á.

Amtsbókasafnið á Akureyri, hefur í mörg ár starfrækt útibú frá Blindrabókasafni Íslands á hljóðbókum. Útibúið hefur nú verið lagt niður hér hjá okkur og er fólki bent á að hafa samband við Blindrabókasafnið beint og fá þjónustu þaðan milliliðalaust. Þjónusta við aldraða og aðra þá sem ekki komast á bókasafnið heldur þó áfram hjá okkur og er hægt að fá bækur sendar heim á vegum Soroptimistaklúbbs Akureyrar.

Þrátt fyrir að hafa lækkað verðið á flestum mynddiskunum úr 400 kr. niður í 200 kr. útlán, þá höldum við auðvitað tilboðsmyndunum áfram, bæði í barnadeild og á 1. hæðinni. Nú hefur verið skipt um þema í tilboðsmyndunum á 1. hæðinni og það er "Bókamyndir". Eins og orðið hljómar, þá eru þetta kvikmyndir sem byggðar hafa verið á bókum.

Nú styttist í að við ræsum blaðamyndavélarnar og höldum áfram þar sem frá var horfið fyrir jól við myndun blaða og bóka. Gera þurfti hlé á verkefninu fyrir jól vegna fjárskorts en nú höfum við fengið fjárveitingu sem gerir okkur kleyft að endurráða tvo starfsmenn með reynslu og sérþekkingu á þessu verkefni og er það vel. Megináherslan er á myndun héraðsfrétta- og landsmálablaða en óskalistinn er langur og margir titlar sem bíða myndunar. Afraksturinn birtist síðan daglega á vefnum www.timarit.is þar sem finna má ógrynnin öll af fróðleik og skemmtun.

Ný gjaldskrá hefur tekið gildi og þar er eina breytingin sú að við höfum lækkað verð á útlánum á flestum mynddiskum úr 400 kr. niður í 200 kr. Dagsektir eru þær sömu á öllum mynddiskum (200 kr.), hvort sem um 200 kr. eða 400 kr. myndir er að ræða (20 kr. dagsekt á fræðslumyndum). Verið því dugleg að skila á réttum tíma eða hringja inn og fá framlengt! :-) Hlökkum til að sjá ykkur!

Það var frísklegur hópur sem heimsótti okkur á þessum fallega degi. Drengirnir töldu jólasveina, skoðuðu bækur, ræddu bestu myndirnar og glöddu okkur með lífsgleði sinni - Takk fyrir komuna!

Starfsfólk Amtsbókasafnsins óskar viðskiptavinum sínum gæfu og góðra bóka á nýju ári! Þökkum allt gamalt og gott og hlökkum til að sjá ykkur 2012 :-)

Á Amtsbókasafninu Brekkugötu 17 - Fimmtudaginn 29. desember kl. 17:00 - Svavar Knútur flytur lög sín og ljóð - Aðgangur ókeypis og allir velkomnir, ömmur og ungabörn og allt þar á milli :-)