Athygli er vakin á því að fyrstu vikuna í maí er unnið að uppfærslu á orlofsstöðu og þess vegna sýnir starfsmannavefurinn www.eg.akureyri.is ekki rétta stöðu fyrr en að því loknu.

Landsbankinn mun greiða út orlof vegna yfirvinnu þann 11.maí og verður það lagt inná launareikninga.  Hafi launareikningur breyst síðasta árið er launþegum bent á að koma þeim upplýsingum til Landsbankans svo orlofsgreiðslur skili sér á réttan reikning.

Fimmtudaginn 5. maí nk. verður send út könnun til allra starfsmanna Akureyrarbæjar sem eru í meira en 30% starfshlutfalli. Könnunin verður send á netföng starfsmanna en þeir sem hafa ekki netföng munu fá upplýsingar um það hvernig þeir geta nálgast könnunina á vinnustað sínum. Í könnuninni er spurt um líðan, heilsu og starfstengd viðhorf starfsfólks sveitarfélagsins á tímum efnahagsþrenginga. Sams konar könnun var gerð í fyrra og eru kannanirnar hluti af doktorsverkefni Hjördísar Sigursteinsdóttur í félagsfræði við Háskóla Íslands. Með könnuninni er einnig verið að uppfylla markmið í mannauðstefnu og jafnréttisstefnu Akureyrarbæjar

Símenntunarmiðstöð Eyjafjarðar stendur fyrir fundarröð tímabilið 3.-31. maí fyrir þá sem hafa áhuga á að kynna sér kosti og galla aðildar Íslands að Evrópusambandinu og samningaferlið sem nú er í gangi vegna aðildarumsóknar Íslands. Aðalsamningamaður Íslands og fulltrúar úr samningahópnum munu skýra frá ferlinu og kynna helstu málaflokka í viðræðum við Ísland og ESB. 

Ríkisstjórnin hefur samþykkt tillögu Guðbjarts Hannessonar velferðarráðherra um átak til að fjölga tímabundnum störfum fyrir námsmenn og atvinnuleitendur Í sumar. Áætlað er að verja allt að 370 milljónum króna til verkefnisins. Vinnumálastofnun mun stýra átakinu sem efnt er til í samvinnu við stofnanir ríkisins og sveitarfélög. Akureyrarbær er eitt þeirra sveitarfélaga sem tekur þátt í verkefninu og mun bjóða atvinnuleitendum og námsmönnum með lögheimili á Akureyri á aldrinum 18-25 ára að sækja um sumarstörf í 8 vikur.

Rekstur Akureyrarbæjar, fyrir fjármagnsliði, gekk vel árið 2010 og betur en áætlanir gerðu ráð fyrir. Sjóðsstreymi var einnig ágætt. Rekstrarniðurstaða fyrir fjármagnsliði var jákvæð um 1.406 millj.kr. en var jákvæð um 1.675 millj. kr. eftir fjármagnsliði. Er það liðlega 600 milljóna króna betri afkoma en áætlanir gerðu ráð fyrir en í áætlun samstæðunnar var jákvæð afkoma áætluð 1.075 millj.kr.

Á starfsmannavefnum www.eg.akureyri.is getur starfsfólk Akureyrarbæjar skoðað orlofsstöðu sína. Staða orlofs er samkvæmt skráningu á síðasta launaseðli. Þess skal þó getið að starfsfólk sem vinnur af sér sumarið s.s. starfsfólk í grunnskólum fær ekki birta orlofsstöðu.

Nú styttist í að Vinnuskóli Akureyrar hefji störf. Búið er að opna fyrir umsóknir í Vinnuskólann á heimasíðu Akureyrarbæjar, http://www.akureyri.is/stjornkerfid/auglysingar/ og stendur umsóknartímabilið til og með 27. apríl nk.