Ókeypis tónlist til útláns á Amtsbókasafninu - nóvember heldur áfram að vera bara flottur mánuður!

Út nóvember mun lánþegum gefast tækifæri á að fá tónlist lánaða ókeypis! Þetta hefur vakið athygli og um að gera að drífa sig á bókasafnið, líta á úrvalið og taka með sér geisladisk/a heim. Það er ekkert hámark eða lágmark á fjölda - lánþegar mega ráða sjálfir. Þetta gildir fyrir ALLA TÓNLIST á geisladiskum (CD) og við bendum á Geymslu 1 sem er á annarri hæð, því þar er að finna þjóðlega tónlist, kvikmynda- og söngleikjatónlist, einleikara, einsöngvara og margt fleira.

Útlánatíminn er hefðbundinn, þ.e. 7 dagar. Sektirnar eru líka hefðbundnar, þannig að ef geisladiskum er skilað of seint, þá reiknast 100 kr. gjald á hvert eintak fyrir hvern þann dag sem farið er fram yfir. Sá sem tæki 20 geisladiska og skilaði þeim tveimur dögum of seint, þyrfti þá að borga 4000 kr. í sektir þrátt fyrir að hafa fengið geisladiskana í ókeypis útlán.

Ekki verður hægt að framlengja nema með því að koma á safnið, skila geisladiskunum og fá þá lánaða aftur út á kortið sitt. Þetta er gert til þess að auka líkurnar á því að fleiri getið notið tilboðsins.

Við hlökkum ávallt til að sjá ykkur á Amtsbókasafninu. Og vonandi mælist þetta vel fyrir því ef vel gengur, þá er aldrei að vita nema "ókeypis tónlist" verði aftur að veruleika!