L7: Hrafnar, sóleyjar og myrra - upplestur höfundar á Amtsbókasafninu á Akureyri
Eyrún Ósk Jónsdóttir
L7: Hrafnar, sóleyjar og myrra
upplestur mánudaginn 13. desember kl. 17:15
Lára Sjöfn hlakkar ekki til sumarleyfisins en kynnist fyrir tilviljun hópi af stórskemmtilegu fólki sem býr í gömlu húsi við sjóinn. Þegar Lára kemst að því að þessir nýju vinir hennar eiga í höggi við illa gefna smákrimma og slóttugan stjórnmálamann sem svífst einskis til að ná sínu fram opnast henni nýr heimur, fullur af ævintýrum. Hún ákveður að taka málin í sínar hendur og fyrr en varir þarf hún að setja sig í spor spæjara og leikara, brjóta lög og reglur og beita ráðsnilld til þess að bjarga fjölskyldu sinni og vinum frá illri ráðagerð óvinarins.
L7: Hrafnar, sóleyjar og myrra er bók fyrir börn og unglinga og er þrungin spennu, húmor og bráðskemmtilegum persónum. -- Hér fyrir neðan má svo sjá þrjár stillur úr samnefndri kvikmynd sem verður sýnd í Sambíóunum í febrúar 2011 og höfundur mun eflaust segja áheyrendum meira frá henni!
Eyrún Ósk Jónsdóttir er fædd 21. september 1981. Hún lauk meistaragráðu í fjölmiðlun og þróunarfræðum frá Winchester University á Englandi árið 2007. Hún útskrifaðist með BA-gráðu í evrópskri leiklist og handritagerð frá Rose Bruford College á Englandi árið 2005.
Eyrún á baki feril sem rithöfundur, leikari, leikstjóri og leiklistarkennari. Eyrún hefur skrifað fjölda leikrita sem hafa verið sett upp í leikhúsum hérlendis og erlendis. Hún hefur sent frá sér tvær ljóðabækur.
