Gestum fækkaði árið 2010 en útlánum fjölgaði - Lánþegar yfir 11.000

Gestum á Amtsbókasafninu fækkaði á milli áranna 2009 og 2010. Samtals komu 127.575 gestir á safnið árið 2009 en árið 2010 voru þeir 122.069. Það gerir um 430 gesti á dag fyrir árið 2010 sem er fækkun um 20 manns að meðaltali.

Lánþegum hefur þó fjölgað á árinu, þeir eru nú 11.007 en 1. janúar 2010 voru þeir 10.343. Alltaf eru einhver skírteini sem renna út og því má áætla að um 1000 nýir lánþegar hafi bæst í hópinn á árinu.

Þrátt fyrir fækkun gesta fjölgaði útlánum af safninu. Þannig voru 192.298 bækur og tímarit lánuð út sem er fjölgun frá árinu 2009 um rúmlega eitt prósent.