Gaudí og mannréttindasamningar - það er margt sem þú finnur á Amtinu!

Einu sinni voru 500 þjóðir. Þær voru áhugasamar um silfur hafsins og skunduðu því á Þingvelli og leiðsögumaður þeirra var Antoni Gaudí. Á leið sinni dró Gaudí upp mannréttindasamninga og talaði um starfsskilyrði stjórnvalda. Ekki voru inkarnir sáttir við þetta og báru fyrir sig trúarbrögð heimsins og sögu hans einnig. Hönnuðir fóru að tala um fornmuni og gömul húsgögn, úti í einu horni heyrðist talað um vindla og svo voru Íslendingasögurnar skoðaðar. Allt kom fyrir ekki og kvikmyndaðir vestrar fengu skell. Saga orðanna var í hættu sem og saga listarinnar. Jörðin og fuglar tóku sig þá til og örkuðu upp á Vatnajökul og litu til Kosovo...

- Þessi litla saga er sögð frá sjónarhóli starfsmanns sem situr við borðið í upplýsingaþjónustu Amtsbókasafnsins. Þaðan getur þessi starfsmaður séð titla á bókum um svo ótrúlega ólík efni. Það má búa til sögu úr þessum titlum eða bara benda ykkur á að upplýsingaþjónusta Amtsbókasafnsins er fær um að finna upplýsingar um næstum því allt. Ritgerðasmíð, rannsóknir, verkefni af öllu tagi ... við gerum okkar besta til að finna efnið handa ykkur.