Árið í tölum og prósentum
Það er góður siður í byrjun árs að skoða tölfræði þess nýliðna og sjá hvernig starfsemin hefur gengið. Ýmislegt skemmtilegt kemur fram þegar rýnt er í tölurnar en hér má sjá það helsta :
Við lánuðum út 196.780 safngögn árið 2013 sem er fækkun um 4.547 eintök frá árinu 2013 eða 2%.
Flest eintök voru lánuð í júlí eða 19.434 en fæst voru þau í desember 13.917.
Mest var minnkunin í útlánum á bókum eða -3.735 (-3%) en næst mest í útlánum á geisladiskum með tónlist -836 (40%).
Er það í samræmi við þróun undanfarinna ára. Hinsvegar jukust útlán á DVD diskum lítillega um 462 útlán (3%).
Þó útlánum hafi fækkað lítillega er það svo enn að Akureyringar nota bókasafnið sitt mjög mikið og eru útlán rétt tæplega 11 (10,95) á hvern íbúa á Akureyri.
Gestafjöldi var einnig heldur færri en árið áður sem nam 1.806 gestum (2%). Gestir voru alls 111.413 á móti 113.219 árið 2012.
Flestir voru gestirnir í júlí eða 12.458 en fæstir í desember 7.619. Greinilegt samhengi virðist því milli heimsókna og útlána.
Hver Akureyringur heimsótti safnið rúmlega sex sinnum á árinu miðað við þessar tölur.
Og í lokin smávegis fésbókartölfræði. Við eignuðumst 255 nýja rafræna vini á árinu 2013.
Í byrjun árs voru þeir 1527 en í lok ársins voru þeir 1782.
Við erum afar ánægð með vinahópinn og viljum gjarnan sjá hann vaxa og dafna enn frekar.
Það eru sem fyrr, fleiri konur í vinahópnum, en við tökum öllum fagnandi, bæði konum og köllum!
