Áfangar
Það hafa verið miklar framkvæmdir og tilfæringar hjá okkur í sumar – Bækur og hillur hafa ferðast milli staða og hæða á meðan nýtt gler var sett í alla austurhlið hússins. Ýmsir efnisflokkar hafa fengið nýtt heimili og hillur sem áður stóðu þversum eru nú langsum – Fræðirit sem voru á 1. hæð hafa verið flutt upp á 2. hæð og tímaritin sem voru uppi eru nú komin niður.
Nú er nokkrum áfanga náð og næsta skref verður að flytja barnadeildina niður á jarðhæðina í suðurenda hússins, þar sem nú er lestrarsalur bakvið gler.
Barnadeildin er þar með komin á fornar slóðir því þar var hún í eina tíð og einnig munu lestrarhestar fá sinn stað á 2. hæð þar sem þeir geta litið upp úr önnum dagsins og látið augu og huga reika um poll og hlíð.
Enn er ekki alveg klárt hvaða efnisflokkar munu fylgja lestrarhestum upp á 2. hæðina, en við látum vita um leið og við vitum það sjálf...
