Fréttir

Samkvæmt farþegatölum frá Grímseyjarferjunni Sæfara voru farþegar ferjunnar 3.088 árið 2007 en 6.535 árið 2012. Farþegafjöldinn hefur því rúmlega tvöfaldast á 5 árum og eru erlendir farþegar í meirihluta 6 mánuði ársins. Til viðbótar hafa skemmtiferðaskip einnig viðkomu í Grímsey og er von á fjórum þeirra næsta sumar. Árið 2008 var tekin í notkun ný Grímseyjarferja fyrir 108 farþega og siglir hún þrisvar sinnum í viku á milli Dalvíkur og Grímseyjar allan ársins hring.

Hollenska listakonan Astrid Nobel dvaldist í Grímsey á dögunum en þangað kom hún í fyrsta sinn fyrir þremur árum síðan. Þá tók hún margar ljósmyndir af sjónum sem höfðu mikil áhrif á hana og hennar listsköpun. “Í Grímsey er einfaldlega dásamlegt að vera og þótt að veðrið hafi ekki verið upp á sitt allra besta þá bætti kyrrðin það sannarlega upp,” segir Astrid.

Þorrablót verður haldið í Grímsey á morgun, föstudag, í félagsheimilinu Múla kl. 20.00. Skemmtidagskráin er sneisafull af heimatilbúnum skemmtiatriðum eyjarskeggja sem munu vafalaust vekja mikla katínu. Veislustjórn verður í höndum Birgis Arasonar og hljómsveitin Í sjöunda himni leikur fyrir dansi fram á rauða nótt.

Sprengidagur var haldinn hátíðlegur í Grímsey í gær og komu eyjarskeggar saman í félagsheimilinu Múla og borðuðu saman saltkjöt og baunir eins og venjan er á þessum degi. Það voru konur í Kvennfélaginu Baugi sem höfðu veg og vanda að eldamennskunni og nutu á bilinu 50-60 manns veiganna.

Bolludagurinn er í dag og honum fagna landsmenn með ýmiskonar hætti. Grímseyingar eru þar engin undantekning og kl. 4.00 í nótt hittust grunnskólakrakkar Grímseyjar í félagsheimilinu Múla til þess að leggja á ráðin. Eftir stuttan fund lá leið þeirra í syðsta hús eyjarinnar þar sem haldið var rakleiðis inn í svefnherbergi húsráðenda og þeir “bollaðir”. Að þessari heimsókn lokinni tók sú næsta við og klukkutíma síðar höfðu krakkarnir heimsótt öll ólæst hús í Grímsey. Húsráðendur voru margir hverjir undirbúnir og verðlaunuðu gestina með sælgæti. Hefð er fyrir því að gefa frí í skólanum í Grímsey á bolludag í stað öskudags og krakkarnir geta því notið sælgætisins í ró og næði það sem eftir lifir dagsins.

Fyrstu rauðmagar ársins veiddust við Grímsey í síðustu viku en þar á bæ eru þeir kallaðir vorboðar, órækur vitnisburður um að sólin hækkar á lofti og líður að vori. Rauðmagarnir fengust í net sem eru lögð yfir vetartímann á um 50-60 faðma dýpi og eru látin liggja í sólarhring í senn.

Norðurheimskautsbaugshlaup TVG-Zimsen fer fram í Grímsey á morgun, laugardag, í fyrsta sinn. Hlaupið hefst kl. 11.00 við félagsheimilið Múla og verða tvær leiðir í boði. Annars vegar verður hlaupinn einn hringur í kringum Grímsey en hann telur tæpa tólf kílómetra og hins vegar verða hlaupnir tveir hringir í kringum eyna, sem teljast þá rúmlega hálfmaraþon. Þetta er í fyrsta sinn sem efnt er til almenningshlaups í Grímsey og aldrei áður hefur verið hlaupið jafn norðarlega hér á landi.

Í dag, föstudag, fer fram reglubundinn stjórnarfundur Sambands íslenskra sveitarfélaga. Vanalega er fundað í Reykjavík en að þessu sinni var ákveðið að bregða út af vananum og halda fundinn í Grímsey. Fundarmenn komu til Grímseyjar í morgun og að lokinni skoðunarferð um eyna tóku við fundarhöld í félagsheimilinu Múla. Alls eru um 40 mál til umfjöllunar og þar af 15 til afgreiðslu. Stjórnin heldur að fundi loknum til Húsavíkur og hittir þar sveitarstjórn Norðurþings.

Sendiherra Bandaríkjanna á Íslandi, Luis E. Arreaga, upplifði sumarsólstöður við heimskautsbauginn í Grímsey ásamt eiginkonu sinni og tveimur barnabörnum. Ekkert þeirra hafði áður komið til Grímseyjar og var fjölskyldan var hæstánægð með daginn.

Góð stemning var á Grímseyjardögum sem haldnir voru hátíðlegir um síðustu helgi í rjómablíðu og koppalogni. Mun fleiri sóttu hátíðina nú en í fyrra og naut fólk útiveru við alls kyns leiki frá morgni til kvölds og fram eftir nóttu í fögru sólsetri.

Grímseyjardagurinn verður haldinn öðru sinni helgina 1.-3. júní nk. Boðið verður upp á fjölbreytta dagskrá sem byggist á grímseyskum hefðum. Farið verður í kríueggjaleit, ratleiki, siglingar og fleira. Vanir menn síga í björg og sækja egg. Dagskránni lýkur síðan með glæsilegu sjávarréttahlaðborði í félagsheimilinu Múla að kvöldi laugardagsins.