Tveir akureyrskir skólar hljóta gæðaviðurkenningu

Tveir skólar á Akureyri fengu í gær gæðaviðurkenningu menntaáætlunar Evrópusambandsins vegna nýsköpunar og nýbreytni í menntun. Viðurkenningarnar voru veittar í gær við hátíðlega athöfn í Ásmundarsafni í Reykjavík.

 

Tíu verkefni, sem hafa verið styrkt af áætluninni, hlutu viðurkenningarnar í ár. Verkefnin eiga það sammerkt að hafa sýnt fram á nýsköpun og nýbreytni í menntun, stuðlað að þátttöku fjölbreyttra hagsmunahópa í alþjóðasamstarfi og haft áhrif á skólastarf einstakra stofnana sem og víðtækari áhrif í skólasamfélaginu.

 

Illugi Gunnarsson, mennta- og menningarmálaráðherra, veitti viðurkenningarnar sem eru í formi myndverka sem hönnuð voru af 15 nemendum á öðru ári í teiknideild í Myndlistarskóla Reykjavíkur. Myndlistarskólinn hefur á undanförnum árum eflst mjög og stækkað með stuðningi evrópska styrkjakerfisins.