Um 140 starfsmenn grunnskólanna á námskeiði í SÍMEY

Um 140 starfsmenn grunnskóla Akureyrarbæjar, þ.e. skólaliðar, matráðar, húsverðir, ritarar og stuðningsfulltrúar, tóku þátt í námskeiði hjá Símenntunarmiðstöð Eyjafjarðar (SÍMEY) dagana 19. og 20. ágúst.

Námskeiðið er hluti af verkefninu ,,Að verða hluti af heild" sem var nú haldið í fimmta skiptið á starfsdögum í byrjun skólaársins.  Námskeiðið er hluti af fræðsluáætlun sem skipulögð var í samstarfi við SÍMEY í kjölfar MARKVISS þarfagreiningarverkefnis fyrir starfsfólk skólanna.

Í ár var boðið upp á fræðslu og þjálfun um sjálfsstyrkingu og liðsheild, um börn með sjúkdómagreiningar (ofnæmi og sykursýki) og um mál- og talgalla.

Leiðbeinendur voru Jóhann Ingi Gunnarsson sálfræðingur, Valdís Jónsdóttir talmeinafræðingur og Gróa Björk Jóhannesdóttir barnalæknir.

Styrktaraðilar námskeiðsins eru Mannauðssjóður Kjalar og Sveitamennt.