Starfsmannakönnun

Fimmtudaginn, 3. nóvember 2016, var send út spurningakönnun til allra starfsmanna Akureyrarbæjar sem eru í meira en 30% starfshlutfalli. Könnunin var send á netföng starfsmanna en þeir sem hafa ekki netföng munu eiga þess kost að svara henni skriflega. Hafir þú ekki fengið könnunina senda hafðu þá samband við Ölmu Rún almarun@akureyri.is.

Í könnuninni er spurt um líðan, heilsu og starfstengd viðhorf starfsfólks sveitarfélagsins eins og undanfarin ár en í þetta skipti verður könnunin heldur styttri. Starfsfólk er vinsamlega beðið um að svara spurningalistanum eins ítarlega og það treystir sér til. Það tekur u.þ.b. 10-15 mínútur.

Könnunin veitir mikilvægar upplýsingar sem gagnast til að stuðla að bættu starfsumhverfi og uppfylla þannig markmið í mannauðstefnu og jafnréttisstefnu Akureyrarbæjar.

Í kjölfar fyrri kannana hefur verið gripið til ýmissa aðgerða. Niðurstöðurnar hafa verið nýttar við stefnumörkun, gerð verkferla og markmiðssetningu ásamt því að ýmiss útbótaverkefni hafa verið sett í gang. Komið var á laggirnar fræðslu um vellíðan á vinnustað og viðbrögð við einelti á vinnustöðum sem haldin er af innanhússfræðarateymi bæjarins. Einstakar deildir hafa unnið áfram með niðurstöður fyrri kannana t.d. með ítarkönnunum um afmarkað efni og viðtölum starfsfólk í þeim tilgangi að vinna að úrbótum á vinnustöðum

Könnunin er unnin í samstarfi við Hjördísi Sigursteinsdóttur aðjúnkt við Háskólann á Akureyri og mun hún sjá um að safna gögnum og vinna úr þeim.

Hafi starfsfólk spurningar eða lendi í vandræðum með að nálgast könnunina skal hafa samband við næsta yfirmann eða Ölmu Rún Ólafsdóttur verkefnastjóra á starfsmannaþjónustu (sími 460 1074/869 1805, tölvupóstur almarun@akureyri.is) eða Hjördísi Sigursteinsdóttur aðjúnkt við HA með tölvupósti á netfangið hjordis@unak.is.

Starfsfólk er hvatt til þess að svara spurningalistanum og leggja þannig vinnustaðnum lið og um leið stuðla að bættu starfsumhverfi fyrir starfsfólk Akureyrarbæjar.