Fréttir

Bæjarráð Akureyrarbæjar hefur skorað á innanríkisráðherra að hrinda í framkvæmd þeim aðgerðum sem snúa að samgöngumálum Grímseyinga og voru samþykktar af ríkisstjórninni í nóvember í fyrra. Þetta kemur fram í bókun ráðsins þann 15. september þegar ráðið fjallaði um stöðu málefna Grímseyjar og byggðaþróunarverkefnisins Brothættar byggðir.

Á þriðja tug hlaupara tók þátt í fimmta Norðurheimskautsbaugshlaupi TVG-ZIMSEN sem fór fram í Grímsey um síðustu helgi og hafa nú vel á annað hundrað manns tekið þátt frá því að fyrsta hlaupið fór fram haustið 2012. Hlaupið hefur skapað sér fastan sess í hlaupaflóru landsins og þátttakendur eru einróma um að það sé með skemmtilegri almenningshlaupum á Íslandi.

Norðurheimskautsbaugshlaup TVG Zimsen verður haldið í Grímsey laugardaginn 3. september kl. 11.00. Fólk getur annaðhvort hlaupið einn 12 km hring um eyjuna eða tvo hringi, samtals 24 km.

Sögulegur viðburður átti sér stað í gær þegar Garðar Alfreðsson flaug vél frá félaginu Circle Air frá Akureyri til Grímseyjar og lenti við heimskautsbaug. Flugið var sögulegt því Garðar er Grímseyingur í húð og hár og mun vera fyrsti grímseyski flugstjórinn sem flýgur þessa leið innan sveitarfélagsins Akureyrarkaupstaðar.

Í sumar hefjast framkvæmdir við að bæta fjarskiptasamband í Grímsey. Heildarkostnaður verksins er 11 milljónir króna og mun stærstur hluti þess verða greiddur með styrki frá Fjarskiptasjóði eða 5 milljónir króna.

Hvalaskoðunarfyrirtækið Ambassador verður með reglulegar siglingar frá Akureyri til Grímseyjar í allt sumar og gera áætlanir ráð fyrir að siglt verði fjórum sinnum í viku. Jómfrúarferðin var farin í gær. Þegar komið var til Grímseyjar var farþegum boðið upp á fiskisúpu og brauð að hætti eyjarskeggja um leið og þeir nutu fróðleiks um sögu eyjarinnar.

Tveir nýir Grímseyingar litu dagsins ljós þann 19. maí síðastliðinn og jókst því fjöldi eyjaskeggja um 3%. Þau Júlía Ósk Ólafsdóttir og Kristófer Sindri Pétursson eignuðust sitt fyrsta barn sem var 15 marka drengur og síðar sama dag eignuðust þau Rannveig Vilhjálmsdóttir og Bjarni Gylfason 14 marka stúlku, sem er þeirra fimmta barn.

Fiskveiðar og útgerð eru forsenda byggðar í Grímsey og því mikilvægast að styrkja þessa þætti, ásamt öðrum þeim atvinnugreinum sem þegar eru í eyjunni. Þetta eru meginskilaboð tveggja daga íbúaþings sem haldið var dagana 1. og 2. maí, sem nær allir fullorðnir íbúar eyjarinnar sóttu og er það metþátttaka. Grunnskólinn var einnig heimsóttur og rætt var við nemendur.

Síðastliðið sumar ákvað Byggðastofnun að Grímsey yrði eitt þriggja nýrra byggðarlaga sem taka þátt í verkefninu "Brothættar byggðir" en sótt var um fyrir tólf byggðarlög. Fyrir náði verkefnið til fjögurra byggðarlaga, þannig að nú eru þau sjö talsins.

Fyrstu vorboðarnir í Grímsey hafa gert vart við sig. Sauðburður hófst 17.mars og nú þegar eru þrjár kindur bornar, fyrst var ærin Lóa sem bar tveimur lambhrútum. Í Grímsey eru tvö fjárbú með alls um 140 ær. Sauðburður hefst að venju af fullum krafti um næstu mánaðamót og eru þessar kindur því nokkuð á undan áætlun.

Velgjörðarmaður Grímseyinga, Daniel Willard Fiske, var fæddur þennan dag árið 1831 og er fæðingardagur hans eins konar þjóðhátíðardagur eyjarskeggja. Af því tilefni verður haldið kaffisamsæti í félagsheimilinu Múla klukkan 18 í dag en fyrir því stendur kvenfélagið í Grímsey og hefur gert svo lengi sem elstu menn muna. Börnin í Grímsey munu sjá um skemmtiatriði.