Samkvæmt kjarasamningum er vinnuveitanda skylt að birta starfsheiti starfsmanna á launaseðlum eins og þau eru skilgreind í kjarasamningum eða starfsmati. Á launaseðlum hjá Akureyrarbæ eru þess vegna birt tvö starfsheiti annars vegar starf sem er starfsheiti samkvæmt kjarasamningi eða starfsmati og hins vegar staða sem er starfsheiti samkvæmt starfslýsingu viðkomandi starfsmanns. Staða er embætti/staða sem setin er af einum starfsmanni skv. starfslýsingu. Dæmi: Hjúkrunarfræðingur Lögmannshlíð, Kennari Síðuskóla og Verkstjóri vinnuskóla. Þetta eru starfsheiti sem notuð eru dagsdaglega í allri umræðu og við undurritun bréfa t.d. Heiti á stöðu er hægt að breyta án mikillar fyrirhafnar eftir þörfum að ósk stjórnenda, en þó er þess gætt að ákveðið samræmi sé viðhaft milli hinna ýmsu stofnana og starfa. Starf er yfirheiti yfir margar stöður og er þar stuðst við starfsheiti skv. kjarasamningi eða starfsmati sem launaröðun byggir á. Dæmi: Hjúkrunarfræðingur Lögmannshlíð er í starfinu Hjúkrunarfræðingur 3 ásamt mörgum öðrum hjúkrunarfræðingum hjá Akureyrarbæ. Nú þegar starfsmat aðildarfélaga BHM er að koma til framkvæmda birtist starfsheiti í starfsmati sem viðkomandi starf er tengt við sem starf á launaseðli. Dæmu um starfsheiti í starfsmati BHM er: ÞÍ – BHM 53 – Þroskaþjálfi (málefni fatlaðra.Fremst í heitinu er skammstöfun félagsins sem um ræðir, síðan kemur númer starfsins í starfsmati BHM og að lokum starfsheitið sjálft. Hér er síðan dæmi um hvernig starf og staða birtist á launaseðlum Akureyrarbæjar:

Á vormánuðum 2018 hófst metnaðarfullt rannsóknarverkefni á vegum vísindamanna við Háskóla Íslands, Áfallasaga kvenna. Rannsóknin miðar að því að skapa þekkingu á umfangi, áhættuþáttum og heilsufarslegum afleiðingum áfalla og ofbeldis gegn konum en samfélagsleg umræða síðasta árs sýnir að það er mikilvægt að varpa ljósi á vægi áhrifa þessara þátta á heilsufar kvenna hér á landi. Rannsóknin er fjármögnuð af Evrópska rannsóknarráðinu og Rannís og er ein stærsta vísindarannsókn sem framkvæmd hefur verið á þessu sviði á heimsvísu.   Öllum konum á Íslandi, 18 ára og eldri, býðst að taka þátt í rannsókninni með því að svara rafrænum spurningalista um áfallasögu sína og heilsufar. Viðtökur við rannsókninni hafa verið góðar - hingað til hafa rúmlega 30 þúsund konur tekið þátt í rannsókninni en skráning nýrra þátttakenda stendur yfir til 1. maí nk.   Vísbendingar eru þegar til staðar um að áföll og ofbeldi hafi hugsanlega enn meiri áhrif á heilsufar og sjúkrafjarvistir kvenna en hingað til hefur verið talið. Rannsóknin Áfallasaga kvenna er mikilvægur liður í því að skapa örugga vísindalega þekkingu á algengi og vægi áfalla í heilsufari kvenna og það er sannarlega sameiginlegt hagsmunamál okkar allra. Með þekkingu breytum við heiminum!   Ég hvet allar konur til að taka þátt í verkefninu þar sem góð þátttaka kvenna skiptir sköpum fyrir vísindalegt gildi rannsóknarinnar og svör allra kvenna skipta máli óháð því hvort þær eiga mikla, litla eða enga sögu um áföll. Allar upplýsingar um rannsóknina  má finna á vefsíðunni www.afallasaga.is    Með hvatningu og góðum kveðjum Ásthildur Sturludóttir bæjarstjóri.

Minnum á að eftirfarandi tilboð er í boði fyrir starfsmenn Akureyrarbæjar: 50% afsláttur af árskorti í Sundlaug Akureyrar. Starfsmenn þurfa að sýna hausinn á síðasta launaseðli.

Á dögunum fundaði bæjarstjórn unga fólksins sem skipuð er fulltrúum ungmennaráðs. Ungmennin sáu um undirbúning að dagskrá og var fundurinn öllum opinn. Bæjarstjórn unga fólksins kom með fjölmargar góðar tillögur sem vísað var til umfjöllunar bæjarráðs, s.s. varðandi samgöngumál, umhverfismál, skólamáltíðir, aðstöðu fyrir sjósund við Pollinn og fleira.

Samkvæmt “Samþykkt um námsleyfi sérmenntaðs starfsfólks Akureyrarbæjar” auglýsir fræðslunefnd Akureyrarbæjar hér með eftir umsóknum til námsleyfa á árunum 2019-2020. Umsóknarfrestur er til 4. apríl 2019. Umsóknin er rafræn inn á íbúagáttinni hér. Umsækjendur eru hvattir til að kynna sér vel “Samþykkt um námsleyfi sérmenntaðs starfsfólks Akureyrarbæjar” á heimasíðu Akureyrarbæjar. Rétt er að benda á að með umsókn um námsleyfi skal fylgja vottorð um samþykki yfirmanns samkvæmt ofangreindri samþykkt. Í vottorðinu skal yfirmaður rökstyðja hvernig námið mun nýtast vinnustaðnum. Fyrirspurnum svarar Anna Lilja Björnsdóttir, mannauðsráðgjafi, í síma 460-1062 eða á annalb@akureyri.is

Á morgun 1. mars er Alþjóðlegi hrósdagurinn. Allir hafa efni á að hrósa og allir græða á því. Það er fátt sem gleður meira, gefur meiri orku og gerir fólk ánægðara en hrós sem er sett fram af einlægni. Hrós felur í sér kærleika og lætur aðra finna að við kunnum að meta þá. Meðfylgjandi er gleðikort frá VIRK sem hægt er að nota til að hrósa samstarfsmanni, maka, systkini, vini eða nágranna rafrænt. Gerum 1. mars að alvöru hrósdegi.