Fréttir

Ferðalag yfir heimskautsbauginn, miðnætursól, fjölskrúðugt fuglalíf, óspillt náttúra, ferskt loft, kyrrð og ró. Það eru innihaldsefni í uppskrift að góðum degi í þætti N4 sem að þessu sinni var tekinn upp í Grímsey.

Vetur skall á með hressilegra móti í Grímsey í gær. Búið er að vera hvasst frá því í gær morgun með allt frá 18 upp í 27 metra á sekúndu og ölduhæðin núna um 5.5 metrar en fór mest upp í 7 metra í nótt.

UPPI OG NIÐRI OG ÞAR Í MIÐJU – eru tónleikar Önnu Jónsdóttur sem haldnir verða á Emelíuklöppum í Grímsey, laugardaginn 20.júlí, kl. 15.00. Anna er sópransöngkona og á tónleikum sínum víða um land syngur hún íslensk þjóðlög.

Dagskrá sumarsólstöðuhátíðarinnar í ár er ansi fjölbreytt. Í næstu viku verður heimskautsbaugstáknið "Hringur og kúla / Orbis et Globus" flutt á núverandi staðsetningu baugsins. Á fimmtudaginn 20.júní hefst síðan formleg dagskrá með fjölbreyttum viðburðum sem stendur fram á sunnudaginn 23.júní.

Undirbúningur stendur nú sem hæst fyrir Sólstöðuhátíðina sem haldin verður í Grímsey um þarnæstu helgi, 20.-23. júní. Þessi helgi í kringum sumarsólstöður er kjörin til að heimsækja Grímsey og njóta alls þess besta sem þessi náttúruperla hefur að bjóða.

Svartfuglinn er nú þegar sestur upp í björgunum til að tryggja sér hreiðurstæði og lundinn kominn að eyjunni. Svafar Gylfason, íbúi í Grímsey sem er við grásleppuveiðar þessa dagana, sá til fyrstu lundana um helgina og segir að þeir séu um viku fyrr á ferðinni en áður var, en hann hefur skráð komu þeirra undanfarin 19 ár.

Um helgina var haldið árlegt þorrablót Grímseyinga i félagheimilinu Múla. Mikið fjölmenni var í eyjunni af þessu tilefni og mættu allir eyjaskeggjar 18 ára og eldri á blótið eða samtals ríflega 80 manns.

Í dag er stysti dagur ársins, vetrarsólstöður. Fæstar birtustundir á öllu landinu eru í Grímsey, norður við heimskautsbaug, en þar eru þær eingöngu rúmar tvær klukkustundir. Daginn tekur að lengja aftur á morgun. Á sumarsólstöðum 21. júní sest sólin ekki í Grímsey og þar er því einstaklega góður staður til þess að njóta miðnætursólarinnar.

Þótt það búi ekki mjög margir í Grímsey þá verður samt ýmislegt þar á seyði yfir hátíðarnar. Í dag, föstudaginn 21.desember, bjóða kvenfélagið Baugur og Kiwanisklúbburinn upp á jólahlaðborð fyrir alla íbúa. Á milli jóla og nýárs verður haldið jólaball þar sem jólasveinar stíga dansinn með jafnt ungum sem öldnum.

Árið 2018 hefur Akureyrarstofa, með stuðningi frá Uppbyggingarsjóði Norðurlands eystra, leitt vinnu við undirbúning markaðssetningar Grímseyjar með áherslu á erlenda ferðamenn. Kynningarefnis hefur verið aflað, bæði myndbanda og ljósmynda, um leið og farið var í greiningu á verðmætasta markhópnum fyrir eyjuna. Það var meðal annars gert með viðtölum við fólk sem starfar við ferðaþjónustu í Grímsey og með því að leggja viðhorfskönnun fyrir ferðafólk á leið úr eyjunni.

Veður er búið að vera gott í Grímsey á aðventunni og mikið um að vera. Búið er að skreyta víða og að venju brosir gamli jólasveinninn nú sínu breiðasta kominn í glugga Grímseyjarbúðarinnar á ný. Löng hefð er fyrir því að halda Lúsíuhátíð í Grímsey og var engin undantekning á því þetta árið þrátt fyrir að börnum hafi fækkað talsvert í eyjunni.