Afþreying

Grímsey er staðsett á norðurheimskautsbaugnum og því er hægt að upplifa einstaka miðnætursól að sumri til. Við sumarsólstöður er sólin fyrir ofan sjóndeildarhringinn allan sólarhringinn. Grímseyingar halda upp á sumarsólstöðurnar með skemmtilegri hátíð ár hvert.

Grímsey er frábær staður til að sjá og njóta norðurljósanna og eru bestu skilyrðin frá síðari hluta september til loka apríl. Norðurljósin koma fram hátt yfir yfirborði jarðar, í 100-250 km hæð og eru við þynnsta lag andrúmslofsins. Norðurljósin eru náttúruleg ljós á himni sem verða til við árekstra hraðfleygra rafhlaðinna agna sem láta þunna loftið skína, líkt og flúorlýsing.

Norður Atlantshafið liggur umhverfis Grímsey. Hægt er að synda í sjónum sem er hreinn en kaldur, að meðaltali 8°C á sumrin og 4°C á veturna.

Í sjónum í kringum Grímsey er mikið af fiski og það er því auðvelt fyrir þá sem eru með réttan útbúnað að veiða t.d. þorsk og ufsa. Norðanmegin á eyjunni eru klettar en klettasillur og grýtt fjara eru aðgengilegar sunnanmegin, t.d. sunnan við gömlu vindmylluna.